Samarqandda keng ko‘lamli rekonstruksiya ishlaridan so‘ng Imom Buxoriy memorial majmuasi o‘z eshiklarini ochdi. Bu maskan butun dunyodan keluvchi minglab ziyoratchilar uchun ma’naviy quvvat, e’tiqod va ilhom manbaidir.

Yangilangan ansambl Islom ilmining boy merosi va zamonaviy infratuzilmani o‘zida mujassam etib, o‘zgacha hurmat, sukunat va ulug‘vorlik muhitini yaratadi.

19-mart kuni Prezident Shavkat Mirziyoyev qayta barpo etilgan Imom Buxoriy yodgorlik majmuasini tantanali ravishda ochib berdi.

Ushbu yorqin va muhtasham majmua haqli ravishda Samarqand hamda Yangi O‘zbekistonning gavhariga aylandi. Maydoni 45 gektarni tashkil etuvchi hududda ma’naviyat, an’analar va zamonaviy me’morchilik uyg‘unlashgan. Majmua hududida 10 ming kishiga mo‘ljallangan ulkan masjid, ma’muriy bino hamda milliy uslubda ishlangan, 154 ta ustunga ega muhtasham ayvon barpo etildi.

Rekonstruksiyaga qadar Imom Buxoriy majmuasiga har yili o‘rtacha 60 ming nafar xorijiy va 127 ming nafar mahalliy sayyoh tashrif buyurgan. Endilikda majmuaning quvvati kuniga 65 ming nafar ziyoratchiga xizmat ko‘rsatish imkonini beradi.

Imom Buxoriy, ya’ni Abu Abdulloh Muhammad ibn Ismoil al-Buxoriy Islom olamining buyuk olimlaridan biri va hadis ilmining asoschisi hisoblanadi. Uning eng mo‘tabar asari — “Al-Jome’ as-Sahih” to‘plami Islom dinida muqaddas Qur’oni Karimdan keyingi ikkinchi eng ishonchli manba deb e’tirof etiladi.

Imom Buxoriy umrining 16 yilini hadislarni sinchiklab o‘rganish, to‘plash va tizimlashtirishga bag‘ishlagan. U hadislarni tekshirishning qat’iy mezonlarini ishlab chiqqani sababli hadis ilmining asoschisi sifatida tanilgan. Hayotining qolgan qismini esa o‘z bilimlarini ulashish va ma’naviy merosni kelgusi avlodlarga yetkazishga sarflagan.

Unga eng katta shuhrat keltirgan asarlar — “At-tarix al-kabir”, “Al-Adab al-mufrad” va, shubhasiz, “Sahihi Buxoriy”dir. Imom Buxoriyning hadislar kitobi hijriy 200–300-yillarda tartib berilgan va “Sihohi sitta” (olti sahih kitob) nomi bilan birlashtirilgan oltita kanonik to‘plamning birinchisidir.

Uning merosi butun Islom olamida yuksak e’tirof etiladi va qadrlanadi. Shu bois ham Indoneziya, Malayziya, Turkiya, Pokiston va boshqa mamlakatlardan kelgan ziyoratchilar bu yerga o‘zgacha ehtirom bilan tashrif buyuradi.

Abu Abdulloh Muhammad ibn Ismoil al-Buxoriyning qabri Samarqanddan 25 kilometr uzoqlikdagi Xartang qishlog‘ida joylashgan. Dastlabki yodgorlik majmuasi 1997–1998-yillarda qurilgan. Prezident Shavkat Mirziyoyev tashabbusi bilan majmua butunlay qayta barpo etildi — yangi ob’ektlar qurilishi to‘rt yilcha avval, ya’ni 2021-yilning aprel oyida boshlangan.

Masjidning maydoni 3 924 kv. m, balandligi — 54 metrni tashkil etadi. U bir vaqtning o‘zida 10 ming kishini o‘z bag‘riga sig‘dira oladi. To‘rtta minoraning har biri 74 metr balandlikka ega.

Hududda, shuningdek, zamonaviy turistik markaz tashkil etilgan. 15 gektar maydonda rivojlangan infratuzilma barpo etildi. Markaz tarkibiga: 240 o‘rinli 1 ta to‘rt yulduzli mehmonxona, 486 o‘rinli 2 ta uch yulduzli mehmonxona, 176 o‘rinli 22 ta oilaviy mehmon uyi, 300 o‘rinli restoran hamda avtoturargoh kiradi. Barcha obyektlar zaruriy kommunikatsiyalar bilan ta’minlangan va mehmonlar qulayligi, jumladan, halol tamoyillariga rioya qilinishiga e’tibor bilan ishlangan.

Maydoni 1 300 kv. m bo‘lgan, 9 ta pavilyondan iborat noyob innovatsion muzey alohida o‘rin egallaydi. Unda nafaqat Imom Buxoriyning hayoti va ilmiy merosi taqdim etilgan, balki muqaddas Qur’onda zikr etilgan 25 nafar payg‘ambar tarixi, Muhammad Payg‘ambarning shajarasi, u kishining Makka va Madinadagi hayoti haqidagi ma’lumotlar, shuningdek, hadislarni to‘plash va yozish jarayoni bilan tanishish mumkin.

14 ta moviy gumbaz va to‘rtta muhtasham 75 metrlik minora ziyoratgohning betakror qiyofasini yaratib, bu yerda osoyishtalik, ma’naviyat va ilhom muhitini ta’minlaydi.