Anonim milliarder "Titanik" kemasi vayronalariga tushish uchun 10 mln dollar toʻlaydi

Noma’lum milliarder “Titan” batiskafi fojiasidan ikki yil o‘tib, “Titanik” kemasi vayronalari ostiga tushishga qaror qildi. Sho‘ng‘ish uchun u 10 mln dollar to‘laydi, deya xabar bermoqda New York Post.

Milliarder 2023-yildagi voqeadan keyin “Titanik"da bo‘lgan birinchi odam bo‘lishni xohlamoqda. Ekspeditsiya bir-ikki haftadan keyin boshlanishi mumkin. Milliarderning ismi sir saqlanmoqda. NYP manbasining ta’kidlashicha, uni ko‘pchilik taniydi.

2023-yil iyun oyida sayyohlarni cho‘kib ketgan afsonaviy “Titanik” kemasi vayronalari tomon olib ketayotgan “Titan” batiskafi bilan bog‘liq fojia yuz bergandi. Suv osti kemasi bilan aloqa 1 soat 45 daqiqa o‘tgach uzilgan. Shundan so‘ng uchinchi kuni AQSH qirg‘oq qo‘riqlash xizmati suvda beshta yirik kema qoldiqlarini topganini ma’lum qilgan. U portlab, barcha yo‘lovchilarning o‘limiga sabab bo‘lgan.

Kema bortida besh kishi bo‘lgan, ular orasida 58 yoshli milliarder Xemish Xarding, pokistonlik tadbirkor Shahzoda Dovud, uning 19 yoshli o‘g‘li Sulaymon va tadqiqotchi Pol-Anri Narjole bo‘lgan. Suv osti kemasini OceanGate kompaniyasi asoschisi Stokton Rash boshqargan.