Reper AGA yangi trekini e'lon qildi

Xorazmlik reper AGA (Ogʻabek) oʻzining navbatdagi treki va unga ishlangan klipini e’lon qildi. U “Dali” deb nomlanadi.

U klipda oʻzbek davlatchiligi tarixi bosqichlaridagi Oʻrta Osiyoda (1512—1920 yillarda) mavjud boʻlgan uchta oʻzbek xonliklaridan biri - Xiva xonligi bayrogʻi tushirilgan futbolkada koʻrinish bergan.

AGA avvalroq “Tony Montana”, “Xolaganim” (“Xohlaganim”) treklari bilan tanilgan. Unga ishlangan kliplar birgina reperning sahifasida mos ravishda 5 va 3,3 mln martadan koʻrilgan. Bundan tashqari, ushbu qoʻshiqlarning parchalari Instagram va TikTok’da trendga aylangan.

Umuman olganda, reperning YouTube sahifasiga shu paytgacha 23 ta trek joylangan. Telegram kanalida esa bundan 2 baravar koʻp — 46 ta. Reper birinchi trekini 2020-yilning yanvarida e’lon qilgan va u “Oposi” deb nomlanadi.

2023-yilda AGA xorazmlik mashhur reper — AslWayne bilan ham duet qilgan. Ikki xorazmlik ijodkorning treki ham shu hududga mos ravishda nomlangan — “Gang90”. AGAning diskografiyasida undan oldin va keyin ham boshqa duet uchramagan.

Ammo 30-may kuni e’lon qilingan va trendga aylangan “Tony Montana” qoʻshigʻida AslWaynega atalgan qatorlar boʻlishi mumkin degan qarash bor. AGA trekda shunday kuylaydi: “Lobr Lobr Orujiyangdan soʻllisan, hali gungacha bir martam otmogon” (xorazm shevasidan erkin “tarjima”: “Qurollaringni maqtanib gapirasan, lekin shu paytgacha biror marta ham otmagan”).

AslWaynening 8-avgustda chiqarilgan “AK47” trekida esa bunday qatorlar bor: “Shundin jorala bor, bor ulada kalash. Samolyot oganinga, muomilada soʻrash” (xorazmcha shevadan erkin “tarjima”: Shunday joʻralar bor, ularda bor kalash (Kalashnikov avtomati nazarda tutilyapti), samolyot olganingda muomalada soʻrashishadi). Ammo ikki trekning reliz sanalariga qaraydigan boʻlsak, bu qarash unchalik ham haqiqatga yaqin emas.