Oldin va hozir: “Brigada” seriali aktyorlari 23 yil ichida qanchalik o‘zgardi?

Rossiya televideniyasining eng mashhur seriallaridan biri — “Brigada” 2002-yilda efirga uzatilgan va qisqa vaqt ichida kult asarga aylangan. Aleksey Sidorov rejissyorligida, Sergey Bezrukov, Dmitriy Dyujev, Vladimir Vdovichenkov, Pavel Maykov va Yekaterina Guseva kabi aktyorlar ishtirokidagi bu 15 qismli drama jinoyat olami, do‘stlik va hokimiyat o‘rtasidagi murakkab chegaralarni yoritadi.

Sugako Hashida yozgan “Oshin” qanday qilib bir ayolning hayot sinovlarini ko‘rsatgan bo‘lsa, “Brigada” ham to‘rt yosh yigit — Sasha Beliy, Kosmos, Fil va Pchyolaning 1990-yillar Moskvasida qashshoqlikdan kuch, ta’sir va boylik sari bo‘lgan og‘riqli yo‘lini hikoya qiladi.

Afisha.uz esa 20 yildan ortiq vaqt o‘tgan “Brigada” aktyorlarining bugungi hayotiga nazar tashlaydi — ular qanday o‘zgargani, ijodiy faoliyatidagi yangi bosqichlar va serialdan keyingi yo‘li haqida qiziqarli ma’lumotlarni taqdim etadi.

Sergey Bezrukov

1973-yilda tug‘ilgan rossiyalik aktyor Sergey Bezrukov “Brigada” serialidagi Aleksandr “Sasha” Beliy roli orqali butun postsovet makonida shuhrat qozongan. U o‘sha paytda 28 yoshda bo‘lib, o‘z qahramonining kuch, sadoqat va ichki ziddiyatlarini chuqur ifodalab, tomoshabinlar qalbidan joy oldi.

Serialdagi muvaffaqiyat Bezrukovning aktyorlik faoliyatidagi burilish nuqtasiga aylandi. Keyingi yillarda u “Yesenin”, “Usta va Margarita”, “Visotskiy” kabi yirik loyihalarda ishtirok etib, o‘zining keng ijro diapazonini namoyish etdi.

Bugun Sergey Bezrukov nafaqat aktyor, balki teatr rahbari, rejissyor va prodyuser sifatida ham faol. U Rossiya madaniyatining eng taniqli san’at arboblaridan biri sanaladi.

Vladimir Vdovichenkov

54 yoshli aktyor Vladimir Vdovichenkov “Brigada” serialida Viktor “Fil” Pchyolkin roli orqali keng tanilgan. U o‘sha paytda 30 yoshda bo‘lib, sadoqatli, kuchli va hayot sinovlariga bardoshli do‘st obrazini mahorat bilan gavdalantirgan. Fil obrazi orqali aktyor insoniylik va qattiqqo‘llik o‘rtasidagi nozik chegarani ko‘rsatib, tomoshabinlarda chuqur taassurot qoldirgan.

Serialdan so‘ng Vdovichenkov Rossiya kinoteatrlari uchun eng talabgir aktyorlardan biriga aylandi. U “Bumer”, “Leviatan”, “Odnoklassniki”, “Otryad” kabi filmlarda bosh rollarni ijro etib, har safar yangi xarakter va dramatik kuch bilan ajralib turgan.

Bugun Vladimir Vdovichenkov kino va teatr sahnasida faol ijod qilmoqda. U o‘zining tabiiy o‘yin uslubi, erkaklarga xos qat’iyligi va chuqur psixologik yondashuvi bilan tomoshabinlar e’tiborini hanuz saqlab kelmoqda. Shunga qaramay, ko‘pchilik uni hanuz “Brigada"dagi sadoqatli va qo‘rqmas Fil sifatida eslaydi.

Dmitriy Dyujev

Rossiyalik aktyor Dmitriy Dyujev serialda Valeriy “Kosmos” Filatov roli orqali mashhurlikka erishgan. U o‘sha paytda 24 yoshda bo‘lib, samimiy, hazilkash va bir vaqtning o‘zida sadoqatli do‘st obrazini o‘ziga xos tarzda gavdalantirgan.

Serialdagi muvaffaqiyat Dyujevga katta sahnalarga yo‘l ochdi. Keyinchalik u “Morskie dyavoly”, “Banditkiy Peterburg”, “Legenda №17”, “Ostrov” va boshqa yirik filmlarda ishtirok etib, aktyorlik mahoratini yanada mustahkamladi.

Bugun Dmitriy Dyujev Rossiya teatr va kinolarining yetakchi aktyorlaridan biri sifatida ijod qilmoqda. U o‘zining chuqur his-tuyg‘ularga boy o‘yini, tabiiy energiyasi va o‘ziga xos ovozi bilan tanilgan.

Pavel Maykov

1975-yilda tug‘ilgan aktyor Pavel Maykov “Brigada” serialida Pavel “Pchyola” Konstantinov roli orqali keng tanilgan. U o‘sha paytda 27 yoshda bo‘lib, o‘z qahramonining asabiy, ehtirosli va sadoqat bilan aralashgan murakkab xarakterini mahorat bilan ifodalagan.

Serialdagi muvaffaqiyat unga katta shuhrat keltirdi, ammo Maykov keyinchalik shu obraz soyasida qolganini ham tan olgan. U “Bumer”, “Maxsus xizmat”, “Kamenskaya” va boshqa loyihalarda suratga tushib, aktyor sifatida o‘z yo‘lini topishga harakat qilgan.

Bugun Pavel Maykov teatr sahnasida faol ijod qilmoqda, musiqiy guruhda ham ishtirok etadi. U o‘zining tabiiy ijrosi, chuqur emotsiyalari va ishonarli dramatik rollari bilan tomoshabinlar e’tiborini hanuz saqlab kelmoqda.

Yekaterina Guseva

Aktrisa Yekaterina Guseva “Brigada” serialida Olga Belaya — Sasha Beliyning rafiqasi rolini ijro etgan. U o‘sha paytda 26 yoshda bo‘lib, o‘z obrazida mehr, sabr va ayol kuchining timsolini yaratgan.

Gusevaning tabiiy o‘yini va chuqur his-tuyg‘ulari “Brigada"ning dramatik ruhiga iliqlik bag‘ishlagan, uning qahramoni esa tomoshabinlar qalbidan mustahkam joy olgan.

Serialdagi muvaffaqiyat Gusevaga katta sahnalar eshigini ochdi. U “Nord-Ost” musiqiy spektakli, “Qotil kundaligi”, “Liliyalarga to‘la uy” va “Eshelon” kabi loyihalarda ishtirok etib, teatr va kinoda barqaror ijodiy faoliyat yuritdi.

Andrey Panin

1962-yilda tug‘ilgan aktyor Andrey Panin “Brigada” serialida Vladimir Kaverin — Sasha Beliyning asosiy raqibi va jinoyat olamidagi xavfli shaxs rolida katta shuhrat qozongan.

Serial namoyish etilgan paytda u 40 yoshda bo‘lib, o‘z qahramonining sovuqqonligi, aql-zakovati va ichki yovuzligini shunchalik tabiiy ifodalaganki, Kaverin obrazi rus televideniyasi tarixidagi eng kuchli antagonistlardan biriga aylandi.

Andrey Panin nafaqat kino, balki teatr sahnasida ham faol ijod qilgan. U o‘zining chuqur psixologik o‘yin uslubi va xarakterlarni hayotiy ifodalashi bilan ajralib turgan. Afsuski, aktyor 2013-yilda vafot etdi, biroq u yaratgan obrazlar, xususan “Brigada"dagi Kaverin qahramoni, hanuz tomoshabinlar yodida tirik.

Mixail Jigalov

83 yoshli Mixail Jigalov — taniqli rus teatr va kino aktyori, ko‘plab jiddiy va obrazli rollari bilan tomoshabinlar yodida qolgan. U “Brigada” serialida adolatli va tajribali militsioner — general Konstantinov obrazini gavdalantirgan.

Jigalovning o‘yini serialdagi jinoyat dunyosiga qarshi kurashayotgan halol kuchlarni ifodalab, voqealarga chuqur ma’no bag‘ishladi. Uning roli “Brigada"dagi to‘qnashuvlarni faqat jinoyatchilar orasidagi mojaro emas, balki axloqiy tanlov masalasi sifatida ko‘rsatdi.

“Brigada"dan oldin ham Jigalov “Militsionerlar”, “Likvidatsiya”, “Brat-2” kabi loyihalarda qatnashgan, har bir obrazida sobitlik, fidoyilik va insoniylikni ifodalagan. Bugungi kunda u Rossiya kinosining tajribali ustalaridan biri sifatida faoliyatini davom ettirmoqda.

Farhod Mahmudov

1972-yilda Toshkentda tug‘ilgan aktyor Farhod Mahmudov Rossiyada o‘z iste’dodi bilan tanilgan san’atkorlardan biridir. U “Brigada” serialida ikkinchi darajali, ammo esda qolarli obraz — tojik biznesmen, Beliyning ishdagi hamkori rolini o‘ynagan.

Aktyor 2007-yil 31-yanvar kuni san’at sohasidagi xizmatlari uchun Rossiya Federatsiyasida xizmat ko‘rsatgan artist unvoniga sazovor bo‘lgan.

Keyinchalik u “Baron”, “Brigada: Merosxo‘r”, “Tez yordam” kabi filmlarda ham suratga tushib, nafaqat aktyor, balki rejissyor sifatida ham o‘zini sinab ko‘rdi.

“Brigada” serialining suratga olish jarayonlari haqida qiziqarli faktlar

“Brigada” ustida ishlash ikki yil davom etdi. Tasvirga olish jarayonida kuzatilgan g‘ayrioddiy faktlarni ko‘rib chiqamiz.

• Rejissyor Aleksey Sidorov aktyorlarning noodatiy tayyorgarligini talab qilgan. Suratga olishdan oldin u bosh rollarni ijro etuvchilarni bir oy davomida ssenariylarsiz va kameralarsiz dam olish uchun bir uyga jo‘natgan. Maqsad oddiy — ular hayotda haqiqiy do‘st bo‘lishlari kerak edi.
• Sergey Bezrukov dastlab Sasha Beliy roliga mos kelmagan. Rejissyorlar Bezrukovni jinoiy avtoritet obrazi uchun juda ziyoli deb hisoblashgan. Ammo aktyor takroriy sinovlarga erishdi va barchani o‘zining ishonchli ekaniga ishontirdi.
• Vladimir Vdovichenkov loyihaga tasodifan tushib qolgan. U “Mosfilm"ga boshqa sinovlar uchun kelgan, tanaffus paytida esa tasodifan “Brigada” rejissyorining yordamchisi bilan gaplashib qolgan. U unga Fil rolini sinab ko‘rishni taklif qilgan.
• Dmitriy Dujev dastlab Pchyola rolini sinab ko‘rgan, ammo oxir-oqibat Kosmosga aylangan.
• Pavel Maykov loyihada ishtirok etganidan afsuslanadi. U pchyola roli bilan faxrlanmasligini ochiqchasiga aytgan, chunki u serialni jinoyat olamining romantizatsiyasi deb hisoblaydi.
• Ssenariy bo‘yicha “Linkoln” avtomobili daryoga tushishi kerak edi, lekin tushmadi. Shuning uchun kadrga yonib ketgan “Moskvich” qo‘yilgan, unga Amerika avtomobilining qoldiqlari payvandlangan.
• Yekaterina Guseva skripka chalishni bilmasdi. Yirik planda professional skripkachi ayol haqiqiy kamonli qo‘lini ko‘ylagining yengidan o‘tkazib ko‘rsatgan.
• Aleksey Sidorovga “Brigada-2"ni suratga olishni taklif qilishganida, u buni million dollarga ham qilmasligini aytgan. Ijodkor so‘zida turdi.
• 2012-yilda “Brigada: Voris” loyihasi chiqdi, ammo na Bezrukov, na Sidorov unda ishtirok etmadi. Guseva bilan Inshakovgina qolishdi.
• Bezrukov ba’zan Beliyning obraziga qayta murojaat qiladi. Masalan, “Soya bilan jang” filmida yoki Timati, Jigan va Yegor Kridning “Rolls Roycye” qo‘shig‘iga ishlangan klipida bir necha soniya.

Saundtrek

Serial musiqasini bastakor Aleksey Sheligin yozgan. Rejissyyor Aleksey Sidorovning soʻzlariga koʻra, u Sheligin tomonidan yaratilgan musiqiy mavzularning oʻz tasavvuriga qanchalik mos kelganidan, shuningdek, ular alohida sahnalarning xronometrajiga toʻgʻri kelganidan hayratda qolgan.

Rasmiy saundtrek 2003-yilda “BMG Russia” tomonidan chiqarilib, “Brigada. Rossiyada bir kuni…” deb nomlangan. Albom o‘z ichiga 18 ta taronani qamrab olgan.