"Oltin globus" O‘zbekistonda birinchi keng ko‘lamli gala-kecha o‘tkazadi

Amerikaning nufuzli “Oltin globus” (Golden Globes) kino mukofoti tarixda ilk bor mintaqaviy tadbir o‘tkazilishini rasman e’lon qildi. 2026-yil 23−24 oktyabr kunlari O‘zbekistonda “Golden Globes Silk Road Tribute Gala” nomli keng ko‘lamli gala-kecha bo‘lib o‘tadi. Tadbir to‘liq Markaziy Osiyo va Kavkaz mamlakatlari kino va televideniyesi sohasidagi yutuqlarga bag‘ishlanadi.

Tashkilotchilarning ta’kidlashicha, bu qadam jahon maydonida yangi ijodkorlarni qo‘llab-quvvatlash va asrlar davomida Ipak yo‘li orqali turli madaniyatlarni bog‘lab kelgan mintaqaning boy ijodiy an’analarini e’tirof etishga qaratilgan. “Oltin globus” prezidenti Xelen Xyonening ta’kidlashicha, Markaziy Osiyo va Kavkaz hozirda mahorati global e’tirofga loyiq bo‘lgan juda kuchli va o‘ziga xos kinematografik ovozlarning uyidir.

“Oltin globus” prezidenti Helen Xen

Loyihaning ishlab chiqarish qismi Vivid Strategies tomonidan mahalliy hamkor Leto Productions bilan birgalikda amalga oshiriladi, prodyuser Orlando Jon esa yulduzli mehmonlarning ijodiy rivojlanishi va integratsiyasi uchun mas’ul bo‘ladi. Vivid Strategies hammuassisi Georgiy Rtsxiladzening so‘zlariga ko‘ra, oktyabr oyida bo‘lib o‘tadigan ochilish mahalliy rejissyorlar va aktyorlarning xalqaro hamkorligi uchun mutlaqo yangi imkoniyatlarni ochadi, ularning asarlari ilgari jahon prokatining soyasida qolib ketgan. Tashkilotchilar ikki kunlik gala-kechaning batafsil dasturi va birinchi sovrindorlar nomini keyinroq e’lon qilishga va’da berdi.

“Oʻzbekiston mezbon mamlakat sifatida tasodifan tanlanmagan. Mamlakat tobora koʻproq yirik xalqaro tadbirlar uchun mintaqaviy markaz sifatida oʻzini namoyon qilmoqda va Ipak yoʻliga bagʻishlangan tantanali marosimga mezbonlik qilish uning global madaniy va koʻngilochar xaritadagi oʻsib borayotgan rolini yanada mustahkamlaydi”, — deya taʼkidladi Dubayda joylashgan Leto Production tashkiloti.

“Oltin globus” mukofoti koʻngilochar sanoatdagi eng nufuzli Amerika mukofotlaridan biri hisoblanadi. Gollivud ierarxiyasida ular an’anaviy ravishda faqat Oskar (filmlar uchun) va Emmi (teleseriallar uchun) mukofotlaridan keyin ikkinchi oʻrinda turadi. “Oltin globus” mukofotida asosiy nominatsiyalar (“Eng yaxshi film”, “Eng yaxshi aktyor” va “Eng yaxshi aktrisa”) janr boʻyicha ikki toifaga boʻlinadi: drama va komediya yoki musiqiy. Bu gʻoliblar sonini ikki baravar oshiradi va komedik loyihalarga teng sharoitlarda raqobatlashish imkonini beradi.