Lars fon Triyer so‘nggi filmini tayyorlamoqda — u statik tasvirlardan iborat bo‘ladi

Rejissyor Lars fon Trier “After” nomli navbatdagi va ehtimol, so‘nggi filmi ssenariysi ustida ishlamoqda. Prodyuser Peter Aalbek Yensenning aytishicha, ssenariy yaqin vaqt ichida tayyor bo‘lishi mumkin, biroq filmning ekranga chiqishiga hali kamida ikki yil bor.

“After” o‘lim va undan keyingi hayot haqida hikoya qiladi. Filmda rejissyorning o‘lim, hayotning o‘tkinchiligi va insonning mavjudligi haqidagi shaxsiy qarashlari katta o‘rin tutadi. Loyiha Daniya Kinematografiya institutidan 1,3 million kron miqdorida rivojlantirish mablag‘ini olgan. Ssenariy yakunlangach, film ishlab chiqarish uchun qo‘shimcha moliyaviy yordam so‘rashi mumkin.

70 yoshli Lars fon Trier 2022-yilda Parkinson kasalligiga chalinganini ma’lum qilgan. Shu sababli “After” rejissyorning jismoniy imkoniyatlarini hisobga olgan holda ishlab chiqilmoqda. Film an’anaviy suratga olishdan farqli ravishda, asosan statik tasvirlardan tashkil topishi kutilmoqda.