Sabrina Karpenter va Margaret Kuolli Fred Aster haqidagi biografik filmda Tom Holland bilan birga rol o‘ynaydi
Karpenter filmda Jinjer Rojers obrazini, Kuolli esa Fredning katta opasi va ilk professional raqs hamkori Adel Aster rolini ijro etadi.
Sony Pictures Tom Holland bosh rolni ijro etadigan Fred Aster haqidagi biografik film ustida ishlamoqda. Loyihaga Sabrina Karpenter va Margaret Kuolli ham qo‘shildi. Karpenter Jinjer Rojers obrazini, Kuolli esa Fredning katta opasi va ilk professional raqs hamkori Adel Aster rolini ijro etadi.
Kartina Aster va uning singlisi tarixiga bag‘ishlanadi. Ular faoliyatini Brodvey va Londonning Vest-End sahnalarida raqs dueti sifatida boshlagan, shundan so‘ng Fred Gollivuddagi faoliyatini davom ettirgan. Uning ekran tarjimai holida Jinjer Rojers bilan birgalikdagi filmlar alohida o‘rin tutadi — ular Amerika kinosi tarixidagi eng mashhur raqs juftliklaridan biriga aylangan. Ssenariy asosida Ketlin Raylining The Astaires: Fred & Adele kitobi yotadi.
Rejissyor — “Paddingtonning sarguzashtlari"ning dastlabki ikki qismi va “Vonka” filmlarini suratga olgan Pol King. U ssenariyni “Tik-tak, bum!” filmi muallifi Stiven Levenson bilan birgalikda yozgan. Filmning rasmiy nomi va premyera sanasi hozircha e’lon qilinmagan. Loyiha Sony Pictures tomonidan 2021-yildan beri ishlab chiqilmoqda.