2026-yilda yangilangan Davlat konservatoriyasi konsert zali qanday koʻrinishga keldi? Foto
Eski yashil devorlar o‘rniga toza oq devorlar va shift paydo bo‘lgan, ular bir zumda fazoni kengaytirdi va uni havo bilan to‘ldirdi.
May oyida Davlat konservatoriyasining Katta va Kichik konsert zallari vizual monumentallik va ilg‘or akustik texnologiyalarni o‘zida mujassam etgan holda yangilangan ko‘rinishda tomoshabinlar e’tiboriga havola etildi. Keng ko‘lamli ishlar nafaqat tashqi ko‘rinishni o‘zgartirishga, balki ovoz bilan ishlashga ham qaratilgan.
770 o‘ringa mo‘ljallangan Katta zalda doimiy tinglovchilar e’tibor beradigan birinchi narsa — bu uning akustikasining tubdan o‘zgarishidir. Eski gilam qoplamasi butunlay olib tashlangan va endi silliq pol tovush to‘lqinlarini yutmaydi. Tovush qaytaruvchi maxsus yog‘och suyanchiqlar bilan jihozlangan yangi tomoshabinlar o‘rindiqlari ham xuddi shu tamoyil boʻyicha ishlangan.
Tabiiy oniksning yoritilgan panellaridan hashamatli va zamonaviy ramkaga ega bo‘lgan sahnaning o‘zi konstruktiv jihatdan qayta qurilgan: pollar almashtirilgan va ikki qavatli paluba taxtasi bilan mustahkamlangan, bu esa kuchli tabiiy rezonator yaratish imkonini berdi.
Vizual idrok nuqtayi nazaridan ko‘zga birinchi tashlanadigan narsa — ranglar palitrasining o‘zgarganidir. Avvalgi yashil devorlar o‘rnini endi xonani bir zumda kengaytirib, havo bilan to‘ldiradigan oppoq devorlar va shift egalladi.
Yangilangan interyer tabiiy materiallar va iliq rang-tuslarning nozik uyg‘unligi asosiga qurilgan. Oqish yog‘och rangidagi tovush qaytaruvchi panellar va och sarg‘ish tusdagi pol yangi o‘rindiqlarning marjon rangli suyang‘ichlari hamda yog‘ochli orqa qismlari bilan ohangdoshlik hosil qiladi. Bunday ranglar yechimi Katta zalga o‘zgacha hashamat va tantanavorlik baxsh etib, ayni paytda e’tiborni ortiqcha chalg‘itmaydi, barchasini asosiy nuqta — sahnaga qaratgan holda interyerning ixchamligini saqlab qoladi.
Konservatoriyaning markaziy foyesi yangilangan yoritish tizimi, yangi qandillar va derazalarda pardalarning paydo bo‘lishi tufayli alohida tantanali va nafis ko‘rinishga ega bo‘lgan. Tomoshabinlarga qulaylik doirasida garderob zonasi va hojatxonalar to‘liq modernizatsiya qilingan.
Asosiy hudud bilan bir qatorda, estetik va texnik o‘zgarishlar konservatoriyaning Kichik konsert zaliga ham ta’sir ko‘rsatgan, u ham zamonaviy musiqa san’ati standartlariga moslashtirilgan.
7 va 14-iyun kunlari Katta zalda Ozarbayjon musiqasi konserti hamda O‘zbekiston davlat simfonik orkestri konserti bo‘lib o‘tadi. Afisha.uz orqali jadvalni koʻrish va chiptalarni sotib olish mumkin.