Toshkentda Xalqaro mushakbozlik festivali o'tkazilishi rejalashtirilmoqda

4−8 sentyabr kunlari Toshkentga tashrifi doirasida rossiyalik teleyulduz, teleboshlovchi, aktyor va prodyuser Leonid Yakubovich 2024-yil bahorida Oʻzbekiston poytaxtida oʻtkazilishi rejalashtirilgan Xalqaro mushakbozlik festivalini loyihasini vazirlik va idoralar hamda shahar jamoatchiligi vakillariga taqdim etdi. Bu haqda Milliy matbuot markazida bo’lib o’tgan matbuot anjumanida maʼlum qilindi, deb xabar bermoqda Afisha.uz muxbiri.

Mazkur festival Navro’z bayrami nishonlanadigan kunlarda oʻtkazilishi va Oʻzbekistondagi pirotexnika shoulari tarixidagi eng yirik tadbir boʻlishi kutilmoqda. Qayd etilishicha, festivalda ishtirok etish uchun turli mamlakatlardan shu sohada faoliyat yuritadigan mutaxassislar jamoalari taklif etilgan.

Tadbirlar tashkilotchilari Oʻzbekistonda ommaviy tadbirlar oʻtkazish bilan shugʻullanuvchi Paragon Show kompaniyasi hamda taniqli tadbirkor, Slovakiyaning Oʻzbekistondagi Faxrli elchisi Vasiliy Shimko hisoblanadi.