Toshkentdan “Yangi Toshkent”ga yangi metro liniyasi quriladi

Toshkentda “Do‘stlik” bekatini Yangi Toshkent tumanlari bilan bog‘laydigan yangi metro liniyasi qurilishi rejalashtirilgan. Bu haqda transport vaziri Ilhom Maxkamov maʼlum qilib, loyiha poytaxt va yangi tumanlar oʻrtasidagi transport aloqalarini yaxshilashga qaratilganini taʼkidladi.

Avvalroq, 2023-yil sentyabr oyida Qurilish va uy-joy kommunal xo‘jaligi vaziri o‘rinbosari Davronjon Odilov Yangi Toshkentni poytaxt bilan ikki metro liniyasi — “Buyuk Ipak yo‘li” va “Do‘stlik” bekatlari orqali bog‘lashni ko‘zda tutuvchi transport modeli ishlab chiqilishi haqida ma’lum qilgan edi. Bu yo‘lovchilarga shaxsiy transportdan foydalanmasdan 30−35 daqiqada yangi shaharga yetib borishiga yordam beradi.

Yangi Toshkentdagi birinchi obyektlar qurilishi 2025-yil aprel oyida boshlangan. Loyiha universitet kampuslari, kutubxona, Milliy teatr, adabiyot muzeyi va boshqa madaniyat muassasalarini qurishni o‘z ichiga oladi.

Shunday qilib, yangi metro liniyasi Toshkent shahri va “Yangi Toshkent” hududlari o‘rtasida qulay va tezkor aloqani ta’minlovchi infratuzilmaning muhim elementiga aylanadi.