"Toshkent-Sharqiy" aeroporti qurilishi yakunlandi

Poytaxtdagi “Toshkent-Sharqiy” aerodromi negizida hukumat va biznes aviatsiyasi majmuasi barpo etilmoqda. Obyektda 2017-yilda boshlangan ishlar yakuniga yetmoqda va 27-avgustda Boeing 767 yirik laynerining birinchi texnik parvozini qabul qildi.

Aeroport 561 gektar maydonni egallaydi. 4 km uzunlikdagi uchish-qo‘nish yo‘lagi va uchta taksi yo‘lagi to‘liq rekonstruksiya qilindi, 20 ta samolyot uchun perron qurildi, og‘ir laynerlar (jumladan, Boeing-787), A320, biznes-jet va vertolyotlar uchun angarlar o‘rnatildi. Muhim delegatsiyalar va biznes aviatsiyasi uchun VIP va CIP terminallari yaratildi. CIP soatiga 100 ga yaqin yoʻlovchini qabul qilishga moʻljallangan va oziq-ovqat maydonlari va doʻkonlarni oʻz ichiga oladi. Aeroport ICAO III-A toifali zamonaviy radio-meteorologik tizimlar bilan jihozlangan bo‘lib, bu uning murakkab ob-havo sharoitida barqaror ishlashini ta’minlaydi.

Yangi majmua biznes va davlat aviatsiyasiga xizmat ko‘rsatish uchun mo‘ljallangan. Bu mavjud Toshkent xalqaro aeroportining ishini yengillashtiradi, xalqaro tashriflar va biznes reyslar imkoniyatlarini kengaytiradi, qo‘shimcha ish o‘rinlari yaratadi va tegishli xizmatlarni rivojlantirishga turtki beradi. Ishga tushirishning yakuniy sanalari va keyingi jadval hali e’lon qilinmagan.

“Ko‘p yil tayyorgarlik qilib, mana shunday aeroport qurdik. Bu ham davlatchilikning yana bir zamini. Bu yerda yurtimizga keladigan mehmonlar va samolyotlarga yuqori darajada xizmat ko‘rsatiladi. Natijada Toshkent xalqaro aeroportiga yuklama yengillashadi. Xudo xohlasa, u aeroport uchun ham boshqa joyda ulkan majmua qurishni rejalashtirganmiz. Umuman, hamma hududlarimizda katta-katta loyihalarni boshlaganmiz. Ilohim, tinchligimizga ko‘z tegmasin, yangi inshootlar, farovonlik xalqimizga buyursin”, — dedi prezident.