Yangi Toshkent aeroporti Yangiyoʻl shahriga yaqin joyda quriladi

Toshkent shahrida yangi xalqaro aeroport qurilishi boshlandi. Shavkat Mirziyoyev 15-oktabr kuni ramziy tamal toshini qo‘yib berdi.

Gazeta’ning aniqlik kiritishicha, yangi aeroport Toshkent viloyatining Oʻrtachirchiq va Quyichirchiq tumanlarida, Yangiyoʻl shahridan taxminan 7 km sharqda joylashadi. Uning umumiy maydoni taxminan 1310 gektarni tashkil qiladi.

Bo‘lajak aeroportning janubida Yangitosh, Tinchlik aholi punktlari, Yangihayot qishlog‘i joylashgan. Gʻarbdan Chirchiq daryosi oqib oʻtadi, sharqda temir yoʻli bor (22 km toʻxtash nuqtasi). Hozirda faoliyat olib borayotgan asosiy Islom Karimov nomidagi aeroportgacha boʻlgan masofa 15 km dan ortiq.

Jurnalist Aziza Qurbonovaning prezidentdan iqtibos keltirishicha, aeroport uchun joy tanlashda hatto ob-havo sharoiti va tuman darajasi ham hisobga olingan — eng kam tuman va barqaror ob-havo bo‘lgan hudud tanlangan.

Loyiha Vision Invest (Saudiya Arabistoni, 45%), Sojitz (Yaponiya, 30%) va Incheon (Janubiy Koreya, 15%) hamda Uzbekistan Airports (O‘zbekiston, 10%) xalqaro konsorsiumlari bilan hamkorlikda to‘rt bosqichda amalga oshiriladi. Qiymati 2,5−2,6 milliard dollar bo‘lgan birinchi bosqich aeroport terminali va aerodrom infratuzilmasini qurishni o‘z ichiga oladi:

• Terminal qurilishiga 1,8 milliard dollar ajratiladi;
• Uchish-qo‘nish yo‘laklari va muhandislik tizimlari uchun 800 million dollar.

U ishga tushgach yiliga 20 million yo‘lovchi va 129 ming tonna yukni qabul qila oladi, soatiga 30 tagacha uchish-qo‘nishni amalga oshiradi va bir vaqtning o‘zida 62 ta samolyotga xizmat ko‘rsatadi.

Duty Free zonasi 46 000 kvadrat metr maydonni egallaydi, bu deyarli dunyodagi eng yirik aeroportlar: Istanbul (50 000), London Xitrou (48 000) va Dubay (40 000) bilan bir xil.

Yangi aeroportga Toshkent — Samarqand, Toshkent — Andijon, Toshkent — Bo‘stonliq pulli avtomobil yo‘llari ulanadi. Shuningdek, tezyurar poyezd qatnovi yo‘lga qo‘yiladi, Toshkent va Yangi Toshkent markazlari o‘rtasida tezyurar poyezd qatnovi yo‘lga qo‘yiladi.