Toshkent–Xiva yo‘nalishida "Jaloliddin Manguberdi" tezyurar poyezdining ilk qatnovi amalga oshirildi
5-may kuni “Toshkent-Markaziy” vokzalida Hyundai Rotem kompaniyasi tomonidan ishlab chiqarilgan “Jaloliddin Manguberdi” nomli yangi tezyurar yo‘lovchi poyezdi tantanali ravishda ishga tushirildi. U Toshkent — Xiva — Toshkent yo‘nalishida qatnaydi.
Tadbirda “O‘zbekiston temir yo‘llari” AJ rahbariyati, Koreya Respublikasining O‘zbekistondagi elchixonasi vakillari, Hyundai Rotem kompaniyasi mutaxassislari hamda soha xodimlari ishtirok etdi.
Yangi poyezd Toshkent va Xiva o‘rtasidagi 1022 kilometrlik masofani 7,5 soatda bosib o‘tadi. Avval bu yo‘l taxminan 14 soat vaqt olardi. Poyezd maksimal 250 km/soat tezlikda harakatlana oladi.
Tarkib 7 ta vagondan iborat bo‘lib, umumiy sig‘imi 389 o‘rinni tashkil etadi. Vagonlar zamonaviy qulayliklar bilan jihozlangan: aylanuvchi o‘rindiqlar, kuzatuv kameralari, yo‘l xaritasi va tezlikni ko‘rsatib boruvchi elektron ekranlar mavjud.
Poyezd O‘zbekiston iqlim sharoitiga moslashtirilgan bo‘lib, +50 daraja issiq va -40 daraja sovuqda ham barqaror ishlaydi. Qizilqum hududidan o‘tishda changning vagon ichiga kirishiga yo‘l qo‘ymaydigan maxsus tizimlar o‘rnatilgan.
Poyezd qatnov jadvali quyidagicha:
- Toshkentdan Xivaga: seshanba, payshanba, shanba kunlari (jo‘nash 07:00, yetib borish 14:31)
- Xivadan Toshkentga: chorshanba, juma, yakshanba kunlari (jo‘nash 07:20, yetib kelish 14:51)
5-may kuni Toshkentdan ilk qatnov amalga oshirildi, 6-maydan boshlab Xivadan muntazam qatnov yo‘lga qo‘yiladi.