Toshkentda Uzbekistan Creative Park homiyligida ikkita flagman hab quriladi
Nukusda bolalar kutubxonasiga ega koʻp funksiyali madaniyat markazi ham quriladi.
23-may kuni O‘zbekiston Madaniyat va san’atni rivojlantirish jamg‘armasi Uzbekistan Creative Park taqdimoti doirasida Toshkentdagi ikkita yirik kreativ park — yangi ekotizim rezidentlari uchun asosiy markazlarga aylanishi kutilayotgan flagman hablar qurilishi loyihalarini namoyish etdi.
Birinchi loyiha — Farobiy koʻchasidagi Flagman Hab. U bir tom ostida biznes-markaz, kovorkinglar, mehmonxona infratuzilmasi, ko‘rgazma va konsert maydonlari, sport zonasi hamda ta’lim dasturlarini birlashtiradi. Eskiz loyihasiga ko‘ra, park hududi uch bosqichda quriladi. Birinchi bosqich tematik direksiya uchun, ikkinchisi ma’muriy ehtiyojlar uchun, uchinchi bosqich esa istiqbolli qurilish hududi sifatida ajratiladi. Farobiydagi park infratuzilmasiga quyidagilar kiradi:
- Park direksiyasining ikki qavatli binosi;
- Konferensiyalar, konsertlar va yirik tadbirlar uchun kovorking va ofislarni o‘z ichiga olgan ko‘p funksiyali markaz;
- Ko‘rgazma pavilyoni va faqat rezidentlar uchun mo‘ljallangan yopiq ichki hovli;
- 3 yulduzli mehmonxona/xostel va mehmonlar uchun apartamentlar;
- O‘z kampusiga ega umumta’lim maktabi, sport zonalari va workout maydonchalari.
Ikkinchi loyiha — “Yangi Toshkent” kampusi. Ushbu ultrazamonaviy kampus Central Asia University va Yangi O‘zbekiston bog‘i yaqinida joylashadi. Uning rejalashtirilishi noyob yarim doira shaklida bo‘lib, kreativ industriyaning eng talabgir yo‘nalishlariga mos zonalarga bo‘lingan. “Yangi Toshkent” parkida quyidagilar paydo bo‘ladi:
- Orkestr yozish imkoniyatiga ega professional ovoz yozish studiyasi va maxsus kino ishlab chiqarish hududi;
- Konferensiya zali, keng kovorking markazi va rezidentlar uchun ofis binolari.
- Badiiy studiyalar, tijorat maydonlari, kafelar va obodonlashtirilgan yashil dam olish maskanlarining katta maydoni.
Har ikki park qulay kirish yo‘llari, yerosti avtoturargohlari va piyodalar uchun yong‘in yo‘laklari bilan jihozlanadi. Natijada ijod qilish, ishlash va yashash uchun qulay mixed-use makonlar yaratiladi.
Shuningdek, Nukus shahrida Bolalar kutubxonasiga ega ko‘p funksiyali madaniyat markazi quriladi. “Istiqlol” bog‘i esa rekonstruksiya qilingan angar bazasida tashkil etiladi.
Bu yerga EXPO 2025 Osaka ko‘rgazmasida O‘zbekistonni namoyish etgan milliy pavilyon ham ko‘chirib kelinadi. Shuningdek, Milan Design Week doirasida Orolbo‘yi mintaqasini namoyish etgan, me’mor Kulapat Yantrasast tomonidan yaratilgan demontaj qilingan o‘tov ham Nukusga olib kelinadi.
Creative Industries Park faoliyati haqida koʻproq ma’lumotni veb-sayt orqali olish va a’zolikka ariza topshirish mumkin.