O‘zbekistonning JCh-2026'dagi o‘yinlari butun Toshkent bo‘ylab katta ekranlarda namoyish etiladi
O‘zbekiston milliy terma jamoasining futbol bo‘yicha Jahon chempionatidagi o‘yinlari Toshkent shahrining barcha tumanlaridagi maxsus maydonlarda jonli efirda namoyish etiladi.
Shahar bog‘lari, xiyobonlari va jamoat joylarida muxlislar uchun katta ekranlar o‘rnatiladi. Eng katta fan-zona “Bunyodkor” stadionida joylashgan bo‘lib, u yerda o‘yinlarni bir vaqtning o‘zida 10 minggacha odam tomosha qilishi mumkin. Bu faqat 23-iyun kuni — Portugaliya va O‘zbekiston terma jamoalari o‘rtasidagi uchrashuv vaqtida faoliyat yuritadi.
Barcha manzillar:
- Bektemir tumani — Rohat mahallasi;
- Mirobod tumani — Furqat bogʻi;
- Mirzo Ulugʻbek tumani — Central Park madaniyat va istirohat bogʻi;
- Olmazor tumani — Gʻalaba bogʻi;
- Sergeli tumani — Markaziy xiyobon;
- Uchtepa tumani — Seoul eco park;
- Chilonzor tumani — Gʻafur Gʻulom nomidagi Dream Park;
- Shayxontohur tumani — Anhor-Lokomotiv bog‘i;
- Yunusobod tumani — Yunusobod sport majmuasi;
- Yakkasaroy tumani — Do‘stlik istirohat bog‘i;
- Yangihayot tumani — INDEX park;
- Yashnobod tumani — Ashxobod bogʻi.
Oʻzbekiston terma jamoasi guruh bosqichida uchta oʻyin oʻtkazadi:
- Oʻzbekiston — Kolumbiya — 18-iyun soat 7:00 da;
- Portugaliya — Oʻzbekiston — 23-iyun soat 22:00;
- Kongo DR — Oʻzbekiston — 28-iyun soat 4:30 da.
Poytaxt aholisi va mehmonlari oʻyinlarni bepul tomosha qilishi va boshqa muxlislar qatori milliy terma jamoani qoʻllab-quvvatlashi mumkin boʻladi.