Toshkentdagi 10 ta modernizm obyekti YUNESKO Butunjahon merosi ro‘yxatiga kiritildi

Toshkent modernizmining 10 ta binosi YUNESKO Butunjahon merosi ro‘yxatiga kiritildi. Qaror 26-iyul kuni Koreyaning Pusan shahrida bo‘lib o‘tayotgan YUNESKO Butunjahon merosi qo‘mitasining 48-sessiyasida ma’qullandi.

Butunjahon merosi ro‘yxatiga kiritish uchun taklif etilgan 30 ta yangi nominatsiya orasida yig‘ilishda O‘zbekistonning “Toshkent modernizm me’morchiligi. Markaziy Osiyoda zamonaviylik va an’analar” milliy nominatsiyasi ko‘rib chiqilgan.

U XX asrning ikkinchi yarmidagi modernizm arxitekturasining jamoat, madaniy, turar joy va muhandislik inshootlarining turli tipologiyalarini aks ettiruvchi 10 ta sara yodgorligini o‘zida jamlagan.

Ro‘yxatdan quyidagi obyektlar o‘rin oldi:

• “Marvarid” (“Jemchug”) turar joy binosi;
• O‘zbekiston tarixi davlat muzeyi;
• Xalqlar do‘stligi san’at saroyi;
• O‘zbekiston davlat san’at muzeyi;
• Toshkent davlat sirki;
• O‘zbekiston badiiy akademiyasining Markaziy ko‘rgazmalar zali;
• O‘zbekiston kino san’ati saroyi;
• “Eski juva” (Chorsu) bozori;
• “Kosmonavtlar” metro bekati;
• Toshkent viloyatidagi “Quyosh” geliomajmuasi.

Prezident administratsiyasi rahbari Saida Mirziyoyeva bu nafaqat alohida binolar, balki 1966-yilgi zilziladan keyin qayta bunyod etilgan Toshkentning butun bir me’moriy davri e’tirof etilganini ta’kidladi.

Madaniyat va san’atni rivojlantirish jamg‘armasi raisi Gayane Umerovaning qayd etishicha, ushbu qaror O‘zbekiston zamonaviy me’morchilik tarixining muhim qismini xalqaro miqyosda e’tirof etadi va mazkur obyektlarni asrab-avaylash bo‘yicha uzoq muddatli mas’uliyatni ham yuklaydi.

Mazkur nominatsiya O‘zbekistonning so‘nggi 25 yil ichida YUNESKO Butunjahon merosi ro‘yxatiga kiritilgan ilk milliy obyekti bo‘ldi.