Turkiston bolalari

Pyesa B.Irzayevning “O'zbek yoshlari va xorijiy ta’lim” kitobi hamda J.Jovliyevning “Qo'rqma” romanidan foydalanilgan holda yozilgan bo’lib, pyesada Turkistonni ozod va obod ko’rishni orzu qilgan, shu maqsadda kurashgan, jadidlarning ko’magi bilan o’tgan asrda Germaniyada o’qigan talabalar haqida so’z boradi. Talabalarning yoshlari, tanlagan, ilm olayotgan sohalari turli xil. Biroq ularning barchasini yagona maqsad birlashtirgan — Turkistonni yuksaltirmoq maqsadi. Ular bu maqsad yo’lida bor kuchlarini sarflaydilar. Hatto aziz jonini garovga qo’yadilar. Vatanning ertasini ozod, obod ko’rish, kelajak avlodni ilmli bo’lishi uchun tinmay mehnat qiladilar. Biroq ularni ham xuddi jadidlar singari sovet hukumatining qonli siyosati o’z domiga tortadi. Maryam Sultonmurodovadan boshqa barcha talabalar jadid ma’rifatparvarlar qatorida sovet hukumatining qurboni bo’ladi.