Ufq

Said Ahmadning “Ufq” romani millionlagan o‘quvchilar qalbidan joy olgan asar bo‘lib, o‘zbek adabiyotida o‘ziga xos o‘rin tutadi. Pesa inssenirovkasi mazkur roman asosida Olimjon Salimov tomonidan yaratilgan bo‘lib, ikkinchi jahon urushi yillarida bir o‘zbek xonadonida yuz bergan voqea o‘z aksini topadi.

G‘alabaning 80 yilligi munosabati bilan sahnalashtirilishi rejalashtirilayotgan ushbu sahna asarida urush insonlar taqdirini kutilmagan o‘zanlarga burib yuborishi bilan birga, ularning qismatida og‘riqli to‘fonlar paydo qilishini ko‘rsatib beradi.

Sahna asarida insonlar orasidagi munosabatlar, er-xotin, ona va bola, bola va ota, bir tuproqda, bir qishloqda unib-o‘sgan, ammo taqdirlari turli xil bo‘lgan do‘stlar hayoti haqqoniy ko‘rsatib beriladi. Asar qahramonlarining bir maromda, quvonchu tashvishlar bilan kechayotgan hayotini urush o‘zgartirib yuboradi. Urushning ta’sirida ularning bir maromda kechayotgan turmush tarzi o‘z o‘zanidan chiqib ketadi. Natijada esa, asar qahramonlarining nafaqat butun o‘y-tashvishlari o‘zgaradi, balki ularning hayotga qarashlari, odamiylik qiyofalari, ko‘ngil tubida yotgan iztiroblari, hammadan yashirgan xislatlariyu sirlari ochilib boradi. Bu esa asar tomoshaviyligini oshirishi bilan birga, tomoshabinni o‘zi haqida yana bir bor o‘ylab ko‘rishga majbur etadi.