Meest China Samarqand va Farg‘onada vakolatxonalarini ochdi
O‘zbekiston bozorida sakkiz yildan ortiq faoliyat yuritib kelayotgan “Meest China” xalqaro logistika kompaniyasi Farg‘ona va Samarqandda ikkita yangi vakolatxona ochilganini ma’lum qildi. Kompaniya Oʻzbekistondagi birinchi ofisini 2017-yilda Toshkentda ochgan.
Har bir vakolatxona ochilishidan oldin, viloyat va mamlakatdan qat’i nazar, kompaniya bozor tahlili, fokus-guruhlar, risk va investitsiyalarni baholaydi. Biroq Oʻzbekistonda hal qiluvchi omil — mijozlarning iltimoslari bo‘ldi. Aynan ular tufayli Farg‘ona va Samarqandda xizmatlarni yanada yaqinroq, qulayroq va biznes hamda shaxsiy buyurtmalar uchun mos qilish maqsadida markazlar ochilmoqda, deydi Meest Chinaning Markaziy Osiyodagi mintaqaviy rahbari Olga Chuyko.
Yangi vakolatxonalar mijozlarga yetkazib beruvchilarni tanlash, tovarlarni tekshirish va yig‘ish, shuningdek, o‘z biznesini rivojlantirishda yordam olishlari mumkin bo‘lgan o‘quv va konsalting markazlariga aylanadi. Meest China mutaxassislari e-commerce va retail sohalaridan taklif etilgan ma’ruzachilar ishtirokida kompaniyaning biznes mijozlari uchun mahorat darslarini o‘tkazishni rejalashtirgan.
Kompaniya Xitoydan yetkazib berishga e’tibor qaratishda davom etmoqda, biroq yangi yo‘nalishlarni ham faol sinovdan o‘tkazmoqda — masalan, O‘zbekiston bozorida kuchayib borayotgan Koreya. Shuningdek, kompaniyaning Yaponiyada ombori mavjud bo‘lib, u yerdan Yevropaga jo‘natmalar amalga oshirilmoqda.
“O‘tgan 8 yil ichida O‘zbekiston bozori juda katta o‘zgardi — yangi yo‘nalishlar, ehtiyojlar va raqobat kuchayishi bilan xizmat ko‘rsatish standartlari ham oshdi. Mijozlar ko‘proq tanlab, talabchan bo‘lishdi. Bu ajoyib. Ana shunday sharoitda eng yaxshi yechimlar tug‘iladi va savdo madaniyati rivojlanadi”, — deya qo‘shimcha qiladi Olga Chuyko.
Internet-savdo va raqamli kanallar (Instagram, Marketplace), shuningdek, viloyatlarda mashhur bo‘lgan street-commerce rivojlangani sari O‘zbekiston aholisi chet eldan xarid qilishni afzal ko‘rayotgani qayd etildi. Eng katta talab kiyim-kechak, elektronika, kosmetika va uy-ro‘zg‘or buyumlariga bo‘lmoqda. Ayniqsa, mahalliy bozorda topish qiyin bo‘lgan noyob, sifatli va brend tovarlarga qiziqish ortib bormoqda.
“Bugungi kunda kompaniya buyurtmalarining 70 foizi B2C segmentiga to‘g‘ri keladi, biroq biz B2B yo‘nalishini, jumladan, API yechimlari va maxsus ombor nazorati orqali faol rivojlantirmoqdamiz”, — deya ta’kidlaydi Olga Chuyko.
Yangi vakolatxonalarda allaqachon operatsion menejer, mijozlarga xizmat ko‘rsatish bo‘yicha menejer, supervayzerlar, marketologlar va mijozlarni qo‘llab-quvvatlash bo‘yicha mutaxassislar ishlamoqda va yaqin kelajakda jamoani kengaytirish rejalashtirilgan.
Meest China haqida:
Meest China — xalqaro logistika kompaniyasi bo‘lib, Meest guruhining bir qismi hisoblanadi. Kompaniya Xitoy, Koreya va Yaponiyadan dunyoning 30 dan ortiq mamlakatlariga tovarlarni yetkazib berishga ixtisoslashgan. Meest China korxonalar va individual mijozlar uchun logistika yechimlarining to‘liq tsiklini taklif etadi: tovarlarni sotib olish va tekshirishdan tortib, uyga yetkazib berishgacha. Asosiy mamlakatlardagi omborxonalar va raqamli yechimlar Meest China-ga 11 yil davomida elektron tijorat va B2B hamkorlik bo‘yicha ishonchli hamkor bo‘lib qolish imkonini beradi.