O‘zbekiston yoshlar terma jamoasi futbol bo‘yicha Osiyo kubogi finaliga chiqdi
20 yoshgacha bo‘lgan futbolchilar o‘rtasida o'tkazilgan Osiyo Kubogi yarim final uchrashuvida o'zbekistonlik futbolchilar Janubiy Koreya terma jamoasini penaltilar seriyasida mag‘lub etib, tarixda ikkinchi bor turnir finaliga yo‘l oldi.
O‘yin 15-mart kuni “Bunyodkor” stadionida bo‘lib o‘tdi. Asosiy va qo‘shimcha bo‘limlarda 0:0 hisobi qayd etilgan bo‘lsa, penaltilar seriyasida o‘zbekistonliklar aniqroq harakat qilib, Janubiy Koreya terma jamoasini 3:1 hisobida mag‘lub etishdi. Jamoa darvozaboni Otabek Boymurodov uchta penaltini qaytarib, uchrashuv qahramoniga aylandi.
Final uchrashuvi 18-mart kuni soat 19:00da “Bunyodkor” stadionida bo‘lib o‘tadi. O’zbekiston terma jamoasining raqibi ikkinchi yarim final uchrashuvida Yaponiya terma jamoasini penaltilar seriyasida mag‘lub etgan Iroq terma jamoasi bo‘ladi.
O‘zbekiston ilk bor 2008-yili yoshlar o‘rtasidagi Osiyo kubogi finaliga chiqqan. O’shanda ham yarim finalda Janubiy Koreya mag’lub etilgan edi, ammo final uchrashuvida o’zbekistonliklar BAA termasiga imkoniyatni boy berishgan.
Ma’lumot uchun, 1-martdan 18-martgacha Toshkent va Farg‘ona shaharlarida 20 yoshgacha bo‘lgan futbolchilar o‘rtasida yoshlar o‘rtasidagi Osiyo kubogi bahslari o‘tkazilmoqda. Turnirda yarim finalga chiqqan 4 ta jamoa 2023-yilda Indoneziyada bo’lib o’tadigan yoshlar o’rtasidagi jahon chempionatiga yo’llanma oldi.