2026-yil Jahon chempionati rasmiy toʻpi namoyish etildi

Futbol boʻyicha 2026-yilgi Jahon chempionati rasmiy to‘pi namoyish etildi. “Trionda” nomli maxsus toʻp “Adidas” kompaniyasi tomonidan ishlab chiqarilgan.

“Trionda” nomi ispan tilidan tarjima qilinganda “uch to‘lqin” degan ma’noni anglatadi. Bu nom birinchi bor uch davlat — Kanada, Meksika va AQSH — birgalikda musobaqani mezbonlik qilayotganini ramziy tarzda namoyish etadi. To‘pning dizayni va innovatsion texnologiyalari musobaqaning tarixiy ahamiyatini o‘zida mujassam etgan.

Toʻpda uch xil — mezbon mamlakatlar ranglari ishlatilgan: Kanada — qizil; Meksika — yashil; AQSH — ko‘k. Yangi to‘rt paneldan iborat shakl, to‘lqin effektlarini aks ettiruvchi chuqur choklar orqali havo harakatida mukammal barqarorlikni ta’minlashi aytilgan. Toʻpda Jahon chempionati kubogiga ishora sifatida oltin bezaklar ishlatilgan.

FIFA prezidenti Janni Infantino quyidagicha izoh berdi:

FIFA Jahon Chempionati-2026 uchun rasmiy to‘p — bu chinakam san’at asari! Men “Trionda” to‘pini taqdim etishdan xursandman va faxrlanaman. “Adida” yana bir bor ramziy va texnologik jihatdan mukammal to‘pni yaratdi — bu dizayn uch mezbon mamlakat — Kanada, Meksika va AQSH — ning birdamligini, ishtiyoqini o‘zida ifoda etadi.

Bu go‘zal to‘pning darvozani to‘riga borib tushishini intiqlik bilan kutyapman. Futbol bayrami tobora yaqinlashmoqda — va to‘p endi harakatda!"

Yopishqoqlikni oshiruvchi yuzaki ikonlar, ayniqsa nam havoda o‘yin uchun qulaylikni ta’minlaydi. Unga 500 gerts chastotadagi harakat datchigi o‘rnatilgan. Bu texnologiya to‘pning harakatini aniq qayd etib, VAR tizimiga real vaqt rejimida ma’lumot yuboradi, ayniqsa noaniq vaziyatlar, jumladan ofsayd holatlarini aniqlashda yordam beradi.