FIFA O‘zbekiston terma jamoasining 2026-yilgi JCh uchun merchini chiqardi
Xalqaro futbol federatsiyasi (FIFA) O‘zbekiston milliy terma jamoasining 2026-yilgi Jahon chempionati final bosqichiga yo‘l olganiga atab, o‘zining maxsus kiyim-kechak va aksessuarlar to‘plamini taqdim etdi.
Tahririyatimiz so‘nggi futbol modalarini tahlil qilib, milliy terma jamoaning yangi formasi tafsilotlarini ko‘rib chiqayotgan bir paytda, FIFA O‘zbekiston terma jamoasining 2026-yilgi Jahon chempionati final bosqichiga ilk bor chiqishi munosabati bilan rasman o‘zining kiyim-kechak va aksessuarlar to‘plamini taqdim etdi.
Bu O‘zbekiston futbol ramzlari ilk bor FIFA’ning rasmiy dropi darajasida taqdim etilishi bo‘lib, butun dunyo muxlislariga milliy futbol tarixidagi eng muhim bosqich sharafiga bag‘ishlangan esdalik sovg‘alarini taklif qilmoqda.
Futbol ishqibozlari uchun dizaynerlar FIFA World Cup 2026™ rasmiy litsenziyasi asosida yaratilgan, sport va kundalik uslubni uyg‘unlashtirgan sodda hamda zamonaviy kolleksiyani taqdim etdi. Kapsula to‘plamidan yumshoq flis matodan tikilgan, erkaklar va ayollar uchun birdek mos erkin bichimli xudi o‘rin olgan. Modelning orqa qismi hajmli grafik tasvir bilan bezatilgan bo‘lsa, yelka qismidagi aksent detal unga o‘ziga xos ko‘rinish bag‘ishlaydi.
Shu uslubdagi erkin bichimli qulay futbolka ham kolleksiyadan o‘rin olgan bo‘lib, unda hajmli print effektini beruvchi original ipak bosma texnologiyasidan foydalanilgan. To‘plamni esa ixcham dizayn va premium detallarga ega, shaklini yaxshi saqlaydigan beysbolka to‘ldiradi. U kundalik obrazning ajralmas qismiga aylanishi va turli uslublar bilan oson uyg‘unlashishi mumkin.
Butun kolleksiyani FIFA Official Store global raqamli platformasining O‘zbekistonga bag‘ishlangan maxsus bo‘limida buyurtma qilish mumkin. Litsenziyalangan yangiliklar uchun narxlar dollarda qayd etilgan: firma beysbolkasi va hajmli bosma matoli futbolkaning har biri 40 dollarga tushadi, flis xudi uchun esa 85 dollar to‘lash kerak bo‘ladi. Rasmiy veb-saytdan O‘zbekistonga to‘g‘ridan-to‘g‘ri yetkazib berish qo‘shimcha ravishda 30 dollarga tushadi.
Eslatib o‘tamiz, O‘zbekiston bugun, 23-iyun kuni soat 22:00 da Portugaliyaga qarshi maydonga tushadi.