Kuzgi kayfiyatni uyg‘otadigan tetiklantiruvchi ichimliklar
“Nega dil orziqadi desam, mana kuz kelibdi yana. Hamon shu kuz tonglarin” jumlasini davom ettira olishingiz shubhasiz, ammo shu kuz tonglarini tetik kayfiyatda davom ettira olasizmi? Afisha.uz sizga kuzning salqin tonglarida iliqlik va tetiklik baxsh etuvchi ichimliklar jamlanmasini taqdim qiladi.
Issiq shokolad
Issiq shokolad — bu shunchaki ichimlik emas, balki kuzning salqin kunlarida kayfiyatni ko‘taruvchi mayin desert. Quyuq tuzilishi, ta’mi va iliqlik beruvchi xususiyati bilan u kakaodan farq qiladi. Ayniqsa yomg‘irli tonglarda yoki shamol esayotgan kechalarda bir piyola issiq shokolad — chinakam quvonch. Bu retsept juda sodda va tayyorlash uchun ko‘p vaqt talab qilmaydi. Eng muhimi, sifatli shokolad tanlashdir.
Tayyorlash usuli:
Issiq shokolad tayyorlash uchun sutni qizdirib oling. Qizigan sutga maydalangan shokolad va bir oz kakao solib, doimiy aralashtiring. Shokolad erib, ichimlik bir xil massaga kelgach, uni finjona quyib agar istasangiz ustini dolchin yoki zefir bilan bezashingiz mumkin.
Zanjabilli kakao
Bu issiq ichimlik klassik kakaoga yangicha ta’m beradi — zanjabilning o‘tkir va biroz achchiq ta’mi shirin shokolad notalari bilan uyg‘unlashib, tanani isituvchi va kayfiyatni ko‘taruvchi mukammal kombinatsiyani hosil qiladi. Bunday ichimlik nafaqat sovuq kunlarda iliqlik yaratadi, balki immunitetni mustahkamlashga ham yordam beradi.
Tayyorlash usuli:
Sutni isitib, keyin unga kakao kukuni, mayda maydalangan zanjabil va shakar qo‘shing. Aralashtirib, qalin masa hosil bo‘lsin. Agar xohlasangiz, ustiga muskat yong‘og‘i yoki dolchin qo‘sha oalsiz.
Qovoqli latte
Bu ichimlik kuzning ramzi hisoblangan qovoqning nozik shirin mazasi va ziravorlar ta’mi uyg‘unlashgan latte turi. Qovoqli latte nafaqat iliqlik baxsh etadi, balki sog‘lom va xushbo‘y alternativ sifatida mashhur. Ayniqsa salqin tonglarda yoki yomg‘irli kechalarda iliq ko‘rpa ostida bunday ichimlikdan bahra olish alohida rohat baxsh etadi.
Tayyorlash usuli:
Sut, qovoq pyuresi, shakar va ziravorlar (dolchin, muskat, zanjabil) kichik idishga solinadi va past olovda qaynatiladi. Aralashma biroz qizigach, olovdan olinadi va unga yangi damlangan qora qahva qo‘shiladi. Ichimlik finjonlarga quyilgach, usti ko‘pirtirilgan qaymoq hamda ozgina dolchin sepilib bezatish mumkin.
Issiq karamel
Kuzgi kayfiyatni ko‘taradigan eng sodda va shu bilan birga nihoyatda mazali ichimliklardan biri. Iliq sut va shirin karamelning uyg‘unligi sizni birinchi yutumdayoq iliqlik chulg‘ab oladi. Ayniqsa, yomg‘irli kunlarda yoki ish kunining oxirida bunday ichimlik kayfiyat bilan birgalikda ruhiyatni ham ko‘tarishga yordam beradi.
Tayyorlash usuli:
Sut va karamel kichik idishga aralashtirilib, past olovda isitiladi. Sut yuzida mayda pufakchalar ko‘ringach, ichimlik tayyor bo‘ladi. Xohlovchilar uchun karamelga biroz vanil qo‘shish ham mumkin — bu ichimlikka yanada boy xushbo‘y hid bag‘ishlaydi. Kaloriyasi 100 gramm uchun 158 kkalni tashkil etadi, shu bois u nafaqat shirin, balki to‘yimli hamdir.
Asalli raf
Bu qahva va asalning uyg‘unligidan tug‘ilgan o‘ziga xos ichimlik bo‘lib, u nafaqat tetiklashtiradi, balki nozik shirin ta’mi bilan ham yoqimli kayfiyat bagʻishlaydi. Iliq kremli tekstura va yengil asal ifori uni kuz va qish mavsumida yanada sevimli qiladi.
Tayyorlash usuli:
Birinchi, qaymoqni taxminan 60 °C gacha isitib oling. Shu paytda kuchli qahva yoki espresso tayyorlab, ichiga bir choy qoshiq asal qo‘shib aralashtiring. So‘ng issiq qaymoq va qahvani qoʻshib, ko‘pik hosil bo‘lguncha yaxshilab ko‘pirtiring. Tayyor ichimlikni shisha yoki keramika finjonlarga quyib, ustidan ozgina dolchin seping, marhamat, asalli raf tayyor.
Matcha moychechak
Sharqona tetiklik va tabiiy sokinlikni birlashtiruvchi ichimlik. Yapon matchasi kuch bag‘ishlasa, moychechak choyi o‘zining tinchlantiruvchi va yengil gullar ifori bilan iliqlik baxsh etadi. Ayniqsa kuzgi kechalarda dam olish, asabni bo‘shashtirish va kayfiyatni muvozanatga keltirish uchun mos.
Tayyorlash usuli:
Avval moychechak choyini damlab, bir necha daqiqa tindirib oling. Alohida idishda matcha kukunini ozgina iliq suv bilan aralashtirib, ko‘pik hosil bo‘lguncha ko‘pirtiring. So‘ng tayyor moychechak damlamasini matcha bilan qoʻshing, yaxshilab aralashtiring. Istasangiz, biroz asal yoki sut qo‘shib, yumshoqroq ta’m bera olasiz.
Masala choyi
Mashhur hind ichimligi bo‘lib, u o‘zining boy ziravorlari tufayli ayni paytda ham tetiklashtiradi, ham osoyishtalik bag‘ishlaydi. Sut, dolchin, kardamon, chinnigul va zanjabilning achchiq-pryan notalari bilan uyg‘unlashib, unutilmas ta’m yaratadi. Hindistonda bu ichimlik nafaqat issiq kunlarda, balki sovuq mavsumda ham oilaviy suhbatlar davrasining ajralmas qismi hisoblanadi.
Tayyorlash usuli:
Tayyorlash uchun suv va sutni aralashtirib, ichiga maydalangan yoki butun ziravorlar — kardamon, dolchin, chinnigul, qora murch donalari va yangi zanjabil qo‘shiladi. Aralashma qaynash darajasiga yetgach, u past olovda 10−15 daqiqa davomida sekin qaynatiladi. So‘ngra qora choy qo‘shilib, bir necha daqiqaga damlanadi. Tayyor ichimlikni sitodan o‘tkazib, shakar yoki asal solinadi.
Zanjabilli koʻk choy
Tetiklantiruvchi va bir vaqtning o‘zida iliq kayfiyat bag‘ishlovchi ichimlik. Yengil achchiq ta’mga ega zanjabil issiqni, asal esa yumshoqlik va tabiiy shirinlikni baxsh etadi. Apelsin bo‘laklari esa ichimlikka sitrusli yangilik baxsh etib, kuzgi kunlarni yanada yorqin qiladi. Bu choy nafaqat lazzatli, balki immunitetni mustahkamlash uchun ham foydali hisoblanadi.
Tayyorlash usuli:
Qaynab turgan suv ichiga maydalangan zanjabil va apelsin bo‘laklarini solib, bir necha daqiqa davomida qaynating. Keyin aralashmaga koʻk choy qo‘shib, past olovda qisqa muddat dam beriladi. Ichimlik biroz sovigach, asal qo‘shib yaxshilab aralashtiriladi. Natijada iliq, xushbo‘y va sog‘lomlashtiruvchi kuzgi choydan bahramand bo‘lasiz.
Chakanda choyi
Foto: Zira.uz
Bu haqiqiy vitaminlar manbai bo‘lib, kuz va qish kunlarida organizmni quvvatlantirish uchun eng yaxshi ichimliklardan biridir. Yorqin to‘q sariq rangli bu choy iliqlik va quyosh nurlarini eslatadi, nordon va shirin ta’mi esa kayfiyatni ko‘tarib, tetiklik baxsh etadi.
Tayyorlash usuli:
Yangi yoki muzlatilgan oblepixa mevalaridan foydalanish mumkin. Mevalar yaxshilab ezilib, issiq suv bilan aralashtiriladi va bir necha daqiqa dam beriladi. Xohishga qarab, ichimlikka apelsin bo‘laklari, dolchin yoki asal qo‘shish mumkin — bu nafaqat ta’mni boyitadi, balki foydasini ham oshiradi. Natijada siz organizmni vitamin C bilan to‘yintiruvchi, tetiklashtiruvchi va iliq kuzgi ichimlikka ega bo‘lasiz.
Dolchinli choy
Ushbu nafaqat iliq va xushbo‘y ichimlik, balki sog‘liq uchun ham foydali odatdir. Dolchin immunitetni mustahkamlashga yordam beradi, hazm jarayonini yaxshilaydi va moddalar almashinuvini faollashtiradi. Bundan tashqari, u o‘zining o‘ziga xos shirin-achchiq ta’mi bilan yuqori kaloriyali shirinliklarga bo‘lgan ishtiyoqni kamaytiradi, shu bois choyga qo‘shilgan dolchin qulay parhezbop yechim hamdir.
Tayyorlash usuli:
Qora yoki koʻk choy damlab, unga dolchin tayoqchasi yoki maydalangan dolchin kukuni qo‘shiladi. Bir necha daqiqa tindirilgach, ichimlik o‘zining yoqimli hidi va mayin achchiq ta’mi bilan kayfiyatni ko‘taradi. Xohlovchilar asal yoki apelsin bo‘lagini ham qo‘shishlari mumkin.
Marokash yalpiz choyi
Issiq iqlimli mamlakatlarida chanqoqni qondirish, bizning sharoitimizda esa sovuq havoda iliqlik beruvchi ichimlikdir. An’anaviy ravishda u yashil choy barglari va yangi yalpiz bilan tayyorlanadi, ba’zida shirin ta’m berish uchun shakar ham qo‘shiladi. Mintaqaviy farqlariga qaramay, bu choyning asosiy maqsadi bir xil — tetiklik va xotirjamlik.
Tayyorlash usuli:
Koʻk choy damlab, so‘ngra ustiga yangi yalpiz barglari va shakar qo‘shing, keyin esa yana biroz vaqt tindiring. Ichimlik tayyor.
Bonus
Novvot choy
Kuz va qish mavsumida kundalik hayotimizning ajralmas qismiga aylanuvchi bu ichimlik nafaqat shirin, balki sog‘liq uchun ham foydali.
Tayyorlanishi juda oddiy: choynakda istalgan turdagi choy damlanadi va novvot solinadi. Bir necha daqiqaga damlang va vualya, choyingiz tayyor!
