Pavel Durov Luvrdan oʻgʻirlangan taqinchoqlarni sotib olib, muzeyga qaytarib bermoqchi, faqat Abu-Dabidagisiga

Telegram messenjeri asoschisi Pavel Durov Parijdagi Luvr muzeyidan oʻgʻrilangan qimmatli taqinchoqlar oʻgʻrilanganini izohladi.

Pavel Durov 21-oktyabr kuni oʻz Twitter sahifasida Luvrdagi oʻgʻrilik boʻyicha yozar ekan, u taqinchoqlarni sotib olib, Abu-Dabidagi Luvr muzeyiga qaytarishga tayyorligini bildirdi.

“Luvrdagi o‘g‘irlikdan sira ajablanmadim. Bu bir paytlar buyuk bo‘lgan mamlakat tanazzulining yana bir qayg‘uli belgisi — u yerda hukumat haqiqiy tahdidlarga qarshi turish o‘rniga xayoliy tahdidlar bilan odamlarni chalg‘itish san’atini mukammallashtirgan”, — deb yozadi u.

Ushbu tvit ostida foydalanuvchilardan biri “Men oʻgʻriladim”, deb yozgan. Telegram asoschisi esa “Oʻgʻrilangan taqinchoqlarni sotib olib, uni Luvrga qaytarishga tayyorman. Ammo Abu-Dabidagi Luvrga, albatta. U yerdan hech kim oʻgʻrilolmaydi”, deb javob bergan.

Parijdagi Luvr muzeyida 19-oktyabr kuni fransuz imperatorlariga tegishli 9 ta buyum oʻgʻrilangan. O‘g‘irlik yetti daqiqa ichida amalga oshirilgan. Talonchilar muzeyga avtokran narvoni yordamida oynani kesib kirishgan va voqea joyini skuterlarda tark etishgan.

Avvalroq esa Afisha.uz Abu-Dabidagi Luvr muzeyi haqida katta obzor tayyorlagandi.

Eslatib oʻtamiz, Pavel Durov bir necha yildan beri BAAda muqim istiqomat qiladi. 2024-yilning avgust oyida esa u Parij aeroportida qoʻlga olingandi. Fransiya rasmiylari Durovni Telegram`da moderatsiya yetishmasligi sababli giyohvand moddalar savdosi, bolalarga qarshi jinoyatlar va firibgarlikda ayblagan va 4 kun qamoqda saqlagan.

“Bir yil avval fransuz politsiyasi umrimda eshitmagan odamlar Telegram’dan jinoiy maqsadlarda foydalanishganini ro‘kach qilib, meni 4 kun hibsda saqlagandi. Yirik platformaning bosh direktorini foydalanuvchilarning harakati uchun hibsga olish yuridik va mantiqiy jihatdan bema’nilik edi”, deb yozgandi u oʻshanda.