"Rick and Morty" multserialining yangi mavsumi chiqadi

Mashhur “Rick and Morty” multserialining 9-mavsumi 24-maydan premyera qilish boshlanadi. Bu haqda The Hollywood Reporter nashri xabar berdi.

Adult Swim prezidenti Maykl Aulin yangi mavsum haqida gapirar ekan, loyiha yana bir bor o‘z darajasini oshirganini ta’kidlagan. Uning so‘zlariga ko‘ra, serial ijodkorlari har bir epizodga juda ko‘p g‘oya va ijodiy yondashuvni joylashtirishga muvaffaq bo‘lgan.

Yangi mavsumning rasmiy tavsifida esa shunday deyiladi:
“‘Rik va Morti' qaytdi! To‘qqizinchi mavsum — bu haqiqiy sertifikatlangan sarguzashtlar to‘plami. Hech qanday sun’iy intellekt mahsuli yo‘q — faqat haqiqiy odamlar tomonidan yaratilgan, jonli va o‘ziga xos epizodlar”.

Yangi epizodlarning ijrochi prodyuserlari sifatida Den Harmon va Skott Marder ishlagan. Skott Marder, shuningdek, loyiha shouranneri sifatida ham faoliyat olib borgan.

Ma’lum qilinishicha, serial kamida 12-mavsumgacha davom etadi. Bundan tashqari, Adult Swim “Rik va Morti” olamiga oid yangi spin-off — President Curtis ustida ham ishlamoqda.

Multserialning birinchi mavsumi 2013-yil dekabrda namoyish etilgan, sakkizinchi mavsum esa 2025-yil may oyida chiqqan. Syujet telba olim Rik Sanches hamda uning sodda, biroq injiq nabirasi Mortining turli paralel olamlar bo‘ylab sarguzashtlarini hikoya qiladi.

Loyiha bir necha mavsum davomida AQSh televideniyesidagi eng yuqori reytingli komedik animatsiyalardan biri bo‘lib qolgan va ikki bor Primetime Emmy Awards mukofotini “Eng yaxshi animatsion dastur” nominatsiyasida qo‘lga kiritgan.