Mustaqillik bayramida ichki turizm uchun 20 foiz chegirma e'lon qilindi

O‘zbekiston Mustaqilligining 34 yilligi munosabati bilan mamlakatda ichki turizm uchun bir qator chegirmalar e’lon qilindi. Bu haqda Turizm qoʻmitasi matbuot xizmati xabar berdi.

Qayd etilishicha, turizm sohasidagi tadbirkorlik subyektlari tomonidan respublika bo‘ylab faoliyat yuritayotgan mehmonxonalar, mehmon uylari, xostellar hamda “Vaqf” xayriya jamoat fondi va Madaniy meros agentligi tasarrufidagi madaniy meros obyektlariga kirish chiptalariga 20 foizgacha chegirmalar taqdim etiladi.

Chegirmalar quyidagi yo‘nalishlarni qamrab oladi:

• Madaniy meros obyektlari, muzeylar va yodgorliklarga kirish chiptalari;
• joylashtirish vositalarida xizmat narxlariga;
• ayrim ekskursiya va sayohat xizmatlariga.

Bundan tashqari, turizm sohasi vakillari va mahalliy hokimliklar bilan hamkorlikda turli madaniy-ko‘ngilochar tadbirlar, ichki turizm yarmarkalari va bayram aksiyalarini tashkil etish bo‘yicha ham ishlar olib borilmoqda.