“Qarshovultepa — 2025: Izlanish natijalari” ko‘rgazmasi
Ayni kunlarda Ikuo Xirayama xalqaro madaniyat karvon saroyining kichik ko‘rgazmalar zalida “Qarshovultepa — 2025: Izlanish natijalari” ko‘rgazmasi bo‘lib o‘tmoqda.
2025-yilda Toshkent viloyatining Chinoz tumanidagi Qarshovultepa maydonida arxeologik qazishmalarning 17-mavsumi bo‘lib o‘tdi. Ishlar bir nechta hududlarda olib borildi.
R-2 hududida ibodatxonani o‘rganish ishlari davom ettirildi. Bu yerda yordamchi xonalar ochildi: don ombori, pechli xona va yana bir xo‘jalik xonasi. R-3 maydonida arxeolog J. Ilyosov zardushtiylik ibodatxonasining xazinasi va xizmat xonalari joylashgan deb taxmin qilingan platformani tadqiq etdi. R-10 maydonida esa arxeolog G. P. Ivanov shimoliy mudofaa devorini o‘rgandi. Aniqlandiki, devorning ilk qismi to‘g‘ri chiziqdan chetga chiqib, tepalikni aylanib o‘tgan ekan. Devorga turar-joy va xo‘jalik imoratlari tutashgan: o‘choq va so‘rilar mavjud bo‘lgan turar-joy xonasi, yong‘in tufayli vayron bo‘lgan omborxona hamda vazifasi noma’lum bo‘lgan yana bir xona. Shuningdek, shahar hududini keyinchalik ikkiga ajratgan devorning izlari ham topildi.
Mavsum natijalariga koʻra, arxeologlar topilgan xonalar va mudofaa devori ostida qoʻshimcha qazishmalar zarurligini ta’kidladilar. Topilgan osori-atiqalar orasida turli diniy jamoalar — zardushtiylar, manixeylar va nestorian nasroniylari mavjudligini tasdiqlovchi dalillar topilgan.
Ko‘rgazma ekspozitsiyasida VI-IX asrlarga oid topilmalar namoyish etilmoqda: urug‘-aymoq sovg‘alarini ifodalovchi tamg‘ali sopol buyumlar, shuningdek, qazilma ishlaridan olingan fotosuratlar taqdim etilgan.
Kirish bepul.
