Toshkentda jamoat transportini 24 soatlik rejimga oʻtkazish taklif qilindi
Prezident huzuridagi Strategik islohotlar agentligi Toshkentning tungi iqtisodiyotini rivojlantirish maqsadida jamoat transportini (avtobus, metro) 24 soatlik rejimga oʻtkazishni taklif qildi.
Ta’kidlanishicha, agentlik tomonidan tungi iqtisodiyot bo‘yicha xorijiy davlatlar (Buyuk Britaniya, AQSH, BAA va Avstraliya) tajribasi va ushbu yo‘nalishni O‘zbekistonda rivojlantirish istiqbollari o‘rganilgan. Unda yillik tushumlar miqdori sezilarli darajada iqtisodiyotga foyda keltirayotgani aniqlangan.
“Toshkent shahrida tungi iqtisodiyotni rivojlantirish uchun birinchi qadam sifatida amalga oshirilishi lozim bo‘lgan imkoniyatlar chetda qolib, bir nechta ko‘chalarni gastronomik ko‘chalarga aylantirish chora-tadbirlari bilan cheklanib qolinmoqda”, deyiladi agentlik xabarida.
Bir qator faktorlardan kelib chiqib, O‘zbekistonda tungi iqtisodiyotni rivojlantirish maqsadida Strategik islohotlar agentligi tomonidan quyidagi takliflar ishlab chiqildi:
- 2025 yil 1 fevraldan boshlab tungi iqtisodiyot va turizmni rivojlantirishga qaratilgan ishchi guruh tashkil etish;
- Tungi iqtisodiyotni qo‘llab-quvvatlash maqsadida har juma va shanba kunlarida dam olish maskanlarni 24/7 rejimida uzluksiz ravishda ishlashini ta’minlash va tunda faoliyat olib boruvchi maskanlarning ish vaqti bilan bog‘liq cheklovlarni bekor qilish;
- Toshkent shahrida turistik salohiyatga ega hududlarni belgilab ushbu hududlarda tungi faoliyat zonalarini tashkil qilish;
- Tungi iqtisodiyot rivojlantirilishi rejalashtirilgan shaharlarning har birida jamoat transportini 24 soatlik rejimga o‘tkazish;
- “Tungi Toshkent” elektron platformasini ishlab chiqish hamda ushbu platformada tunda faoliyat olib boradigan maskanlar, tungi jamoat transporti yo‘nalishlari hamda maxsus arzonlashtirilgan takliflar haqida ma’lumot olish imkonini yaratish;
- Tungi iqtisodiyotni rivojlantirish maqsadida belgilangan muayyan hududlarni modernizatsiya qilish, ko‘chalarda yoritish tizimini kuchaytirish hamda aholi va turistlar uchun qo‘shimcha qulayliklar yaratish.
Yuqoridagilardan kelib chiqqan holda Prezidentning “O‘zbekistonda tungi iqtisodiyotni yanada rivojlantirish chora-tadbirlari to‘g‘risida"gi Farmoni loyihasi hamda tungi iqtisodiyotni rivojlantirish va litsenziyalar berish tartibini isloh qilishni nazarda tutuvchi O‘zbekiston Respublikasi Qonuni loyihasini ishlab chiqish maqsadga muvofiq hisoblanishi ta’kidlangan.