Toshkent Markaziy Osiyoda birinchi marta 2025-yilgi FIA Bosh assambleyasi va taqdirlash marosimiga mezbonlik qiladi
2025-yilning dekabr oyida Toshkent jahon avtosporti markaziga aylanadi. O‘zbekiston poytaxtida ilk bor ikkita muhim xalqaro tadbir bo‘lib o‘tadi: Xalqaro avtomobil federatsiyasi (FIA) Bosh assambleyasi va FIA mukofotlarini topshirish marosimi. Ushbu tarixiy voqea Markaziy Osiyoda birinchi marta o‘tkazilayotgan bunday yuksak saviyali tadbir bo‘ladi.
FIA (Fédération Internationale de l’Automobile), 1904-yilda tashkil etilgan boʻlib, avtosportni tartibga soluvchi va yoʻl harakati xavfsizligi tashabbuslarini ilgari suruvchi yetakchi global tashkilotdir. FIA Bosh Assambleyasi besh qit’aning 149 mamlakatidan milliy avtomobil klublari prezidentlarini birlashtiradi. Bosh Assambleya doirasida Butunjahon avtomobil sporti kengashi, Butunjahon sayyohlik va turizm kengashi va FIA Senatining yigʻilishlari oʻtkaziladi. Ushbu uchrashuvlar avtosport, barqaror sayyohlik va xavfsizlik innovatsiyalarini rivojlantirishni shakllantiradi.
Assambleya har yili Formula 1 va WRC dan WEC va Formula E gacha boʻlgan eng yaxshi haydovchilar, jamoalar va FIA chempionatlarining tashkilotchilarini taqdirlaydigan FIA mukofotlarini topshirish marosimi bilan yakunlanadi. 2003-yildan beri marosim Monte-Karlo, Nyu-Dehli, Sankt-Peterburg, Boku, Kigali va boshqa global shaharlarda oʻtkazilib kelinmoqda.
Ushbu tadbirlarning Toshkentda o‘tkazilishi nafaqat mintaqaning o‘sib borayotgan rolini e’tirof etish, balki Markaziy Osiyo avtosporti tarixida yangi sahifani ochadi. Bu yoshlar va mutaxassislar uchun yangi istiqbollarni ochib beradi, turizm, infratuzilma va taʼlim sohasidagi tashabbuslarni rivojlantirishga turtki beradi hamda Oʻzbekistonning FIA ning ishonchli hamkori sifatidagi xalqaro imidjini mustahkamlaydi.
Tadbir, ayniqsa, har to‘rt yilda bir marta o‘tkaziladigan FIA prezidentligiga saylovlar Toshkentdagi Assambleya doirasida bo‘lib o‘tishi bilan ahamiyatlidir. Ushbu ramziy lahza Federatsiyaning ochiq muloqot va geografik chegaralarini kengaytirish, Markaziy Osiyoni jahon avtosport hamjamiyatining yangi va muhim markazi sifatida mustahkamlashga sodiqligini ta’kidlaydi.