“Naqsh” hunarmandchilik maktabi yangi oʻquv ustaxonasi uchun qabul e'lon qildi

Toshkent shahridagi “Naqsh” hunarmandchilik maktabi O‘zbekiston me’moriy merosidagi geometriya va bezak san’atiga bag‘ishlangan yangi o‘quv ustaxonasiga qabul boshlanganini e’lon qildi. Naqsh maktabi O‘zbekiston Madaniyat va san’atni rivojlantirish jamg‘armasi tashabbusi bilan, Qirollik jamg‘armasi huzuridagi An’anaviy san’at maktabi (KFSTA, London) bilan hamkorlikda tashkil etilgan.

“Bezak va geometriyaga kirish” nomli chuqurlashtirilgan dastur doirasida 15 nafar yosh ijodkor va hunarmandchilik ishqibozlari O‘zbekiston me’moriy an’analarida qo‘llanilgan geometrik tizimlar va naqsh tamoyillarini o‘rganish imkoniyatiga ega bo‘ladi. Ishtirokchilar Oltin nisbatga asoslangan bezak tuzilmalarini tahlil qilib, ushbu qonuniyatlarning Registon ansambli va Bibixonim majmuasi kabi me’moriy yodgorliklar shakllanishidagi o‘rnini o‘rganadilar.

Mashg‘ulotlar Qirollik jamg‘armasi huzuridagi An’anaviy san’at maktabining tajribali ustozlari tomonidan olib boriladi. Dastur nazariy bilimlar bilan bir qatorda amaliy mashg‘ulotlarni ham o‘z ichiga olib, naqsh san’atida geometriyani qo‘llashning asosiy usullarini chuqur anglashga qaratilgan.

Mazkur kurs “Naqsh” hunarmandchilik maktabining besh bosqichdan iborat “Sinov yili” dasturining ikkinchi moduli hisoblanadi.

Ustaxona 2026-yil 26-yanvardan 13-fevralga qadar Toshkent shahrida bo‘lib o‘tadi. Ishtirok etish to‘lovi — 200 AQSh dollari. Arizalar “Naqsh” hunarmandchilik maktabining rasmiy veb-sayti orqali yoki ushbu havola orqali qabul qilinadi. Arizalarni topshirishning soʻnggi muddati 2026-yil 4-yanvar, soat 23:59 gacha. Ishtirokchilar soni cheklangan — 15 nafar qabul qilinadi.