O‘zbekiston milliy jamoasi Turkmanistonni irodali tarzda mag‘lub etdi

Futbol bo‘yicha O‘zbekiston milliy terma jamoasi JCh-2026 saralash turnirini Turkmaniston ustidan irodali g‘alaba bilan boshladi. 16-noyabr kuni Ashxobodda bo‘lib o‘tgan uchrashuvda Otabek Shukurov dubl qayd etdi, Eldor Shomurodovda esa ikkita assist va bitta golga mualliflik qildi.

Uchrashuvning 44-daqiqasida mezonbonlar hisobni ochdi — himoyachi Meylis Durdiyev uzoq masofadan O‘tkir Yusupov darvozasini ishg‘ol qildi.

Ikkinchi bo‘lim o‘zbekistonlik futbolchilar nazoratida o‘tdi. Yarim himoyachi Otabek Shukurov 57 va 77-daqiqalarda Eldor Shomurodovning paslaridan keyin gollar kiritib, dubl qayd etdi.

Uchrashuvning asosiy vaqtiga qo‘shib berilgan daqiqalarda (90+1) Eldor Shomurodov Otabek Shukurovning pasidan yakuniy hisobni o‘rnatdi — 1:3.

O‘zbekiston joy olgan “E” guruhining parallel o‘yinida Eron Gonkongni 4:0 hisobida mag‘lub etdi. Shunday qilib, Eron terma jamoasi gollar nisbati hisobiga (+4) guruhda birinchi o‘rinni egallagan bo‘lsa, O‘zbekiston ikkinchi o‘ringa joylashdi.

Ma’lumot uchun, O‘zbekiston milliy jamoasining navbatdagi uchrashuvi 21-noyabr kuni “Bunyodkor” stadionida Eronga qarshi bo‘lib o‘tadi.