O‘zbekistonda tuya sporti va chavgon federatsiyasi faoliyati tashkil etildi
O‘zbekistonda Tuya sporti va Chavgon federatsiyasi tashkil etildi. Bu mamlakat milliy sport hayotida yangi va dinamik yo‘nalishni rivojlantirishga asos soladigan muhim voqea hisoblanadi.
Federatsiyaning tashkil etilishi sportning yangi turlarini ommalashtirishga va O‘zbekistonning jahon sport hamjamiyatiga chuqurroq integratsiya boʻlishiga xizmat qiladi. Ilk bor davlat darajasida chavandoz-sportchilarni tayyorlash, tuyalarni saralash va mashq qilish, chavgonni rivojlantirish hamda ushbu sport turlari bo‘yicha milliy musobaqalarni tashkil etish bo‘yicha tizimli ish yo‘lga qo‘yiladi.
Federatsiya faoliyatining asosiy yo‘nalishlari:
- “Xalqaro hamkorlik”: O‘zbekiston rasman Xalqaro Chavgon federatsiyasi a’zosi bo‘ldi. Shu bilan birga, jahon tuya sporti federatsiyasi (World Camelids Sports) bilan to‘la huquqli a’zolik bo‘yicha muzokaralar olib borilmoqda. Bu esa o‘zbekistonlik sportchilarga Osiyo olimpiya kengashi tomonidan tan olingan xalqaro tuya sporti federatsiyasi himoyasidagi rasmiy musobaqalarda ishtirok etish imkonini ochadi;
- “Yirik musobaqalarga tayyorgarlik”: Federatsiya milliy terma jamoani nufuzli xalqaro startlarda debyutga tayyorlash bo‘yicha faol ish olib bormoqda. Asosiy e’tibor 2025-yil 22−31 oktyabr kunlari (Manama, Bahrayn) bo‘lib o‘tadigan Yoshlar Osiyo o‘yinlari hamda 2025-yil 7−21 noyabr kunlari (Er-Riyad, Saudiya Arabistoni) bo‘lib o‘tadigan Islom birdamligi o‘yinlariga qaratilmoqda;
- “Milliy darajada rivojlantirish”: Federatsiyaning hududiy bo‘limlarini tashkil etish, milliy chempionatlar va festivallar o‘tkazish rejalashtirilmoqda. Bu sport turlarini yoshlar orasida keng targ‘ib qilishga xizmat qiladi.
Tuya sporti xalqaro darajada tan olingan va dunyoda 20 dan ortiq mamlakatlarda, jumladan, BAA, Saudiya Arabistoni, Qatar, Ummon, Bahrayn, Avstraliya va boshqa davlatlarda faol rivojlanmoqda. O‘zbekistonda Tuya sporti va Chavgon federatsiyasini tashkil etish — zamon talabiga javob beradigan, sport diplomatiyasi va turizmda yangi imkoniyatlarni ochadigan dolzarb qadamdir.
Yangi tashkil etilgan federatsiya jahon sport harakatining faol ishtirokchisiga aylanib, O‘zbekiston hududida ushbu noyob sport turlarini rivojlantirish va ommalashtirishga o‘z hissasini qo‘shishni maqsad qilgan.
Reklama huquqlari asosida.