“Naqsh” hunarmandchilik maktabi uchinchi modul uchun qabul e'lon qildi

“Naqsh” hunarmandchilik maktabi O‘zbekistondagi me’moriy meros asosida “Proportsiya va kompozitsiya” mavzusida yangi mahorat darslarini boshlayotganini e’lon qildi.

Ustaxona O‘zbekiston Madaniyat va san’atni rivojlantirish jamg‘armasi hamda Londondagi Qirollik jamg‘armasining An’anaviy san’at maktabi hamkorligida tashkil etilgan.

Uch haftalik amaliy kurs davomida tanlab olingan 15 nafar ishtirokchi me’moriy kompozitsiya va proportsiya tamoyillarini o‘rganadi. Mashg‘ulotlar Samarqanddagi Shohi Zinda ansamblidagi Shodi-Mulk og‘a maqbarasi misolida olib boriladi. Ishtirokchilar geometriyaning fasad, balandlik va bezak elementlarini qanday uyg‘unlashtirishini tahlil qilib, arxitektura tuzilishi va dekorativ naqsh o‘rtasidagi munosabatni chuqur o‘rganadi.

Shuningdek, kurs davomida bezak ramkalari va chegaralarini loyihalash, biomorfik chizma hamda bo‘yoq ishlari bo‘yicha amaliy ko‘nikmalar beriladi.

Mazkur ustaxona “Naqsh” maktabining besh modulli sinov yilining uchinchi moduli hisoblanadi. Dastur kelajakda san’at va dizayn sohasida faoliyat yuritadigan yangi avlod ijodkorlarini tayyorlashga qaratilgan.

Kurs 2026-yil 30-martdan 17-aprelga qadar (faqat ish kunlari) Toshkentda o‘tkaziladi. Ishtirok etish uchun 15 nafar nomzod tanlab olinadi. Kurs narxi 200 AQSh dollarini tashkil etadi.

Ariza topshirish jarayoni hozir ochiq bo‘lib, ishtirok etmoqchi bo‘lganlar www.naqshschoolofcrafts.uz sayti orqali murojaat qilishi mumkin.