Toshkentda Mudofaa vazirligi qo‘shinlarining tantanali piyoda yurishlari boʻlib oʻtadi

Toshkent shahrining asosiy ko‘chalarida 20-aprel kuni Mudofaa vazirligi qo‘shinlari harbiy bo‘linmalarining tantanali piyoda yurishlari tashkil etiladi. Bu haqda Mudofaa vazirligi Axborot va ommaviy kommunikatsiyalar departamenti xabar berdi.

Qurolli Kuchlar akademiyasi (Mustaqillik ko‘chasi) — Amir Temur xiyoboni — Respublika travmatologiya va ortopediya ilmiy tadqiqot instituti (Temiryo‘lchilar ko‘chasi) — Toshkent markaziy EKO bog‘i (“EKO” park, Maxtumquli ko‘chasi) — Toshkent Markaziy bog‘i (Hamidulla Oripov ko‘chasi) — Qurolli Kuchlar akademiyasi yo‘nalishi bo‘ylab harakatlanish davomida harbiy xizmatchilarning bo‘linma tarkibida, orkestr sadolari ostida, saf qo‘shiqlarini ijro qilgan holda tantanali piyoda yurishlari rejalashtirilgan.

Tantanali ravishda piyoda yurayotgan harbiy boʻlinmalarning toʻxtash nuqtalarida, yaʼni Amir Temur xiyoboni hamda Respublika travmatologiya va ortopediya ilmiy tadqiqot instituti hududi maydonida harbiy xizmatchilarning qoʻl jangi va Faxriy qorovul jamoasining koʻrgazmali chiqishlari, boʻlinmaning jangovar chaqirigʻi, harbiy orkestrning difele namoyishlari ijro etiladi.

Harbiy boʻlinmalarning tantanali ravishdagi piyoda yurishlari soat 12:00 da Qurolli Kuchlar akademiyasi asosiy darvozasidan boshlanadi.