Doimiy Samsung soatlari foydalanuvchisidan Galaxy Watch6 Classic haqida sharh
Qariyb ikki yildan beri har kuni Samsung soatlaridan foydalanib kelayotgan muharririmiz kompaniyaning yangi modelini sinovdan o‘tkazdi va o‘z taassurotlari, Watch6 Classic`dagi o‘zgarishlar haqida gapirdi.
Biz Samsung Galaxy Unpacked yozgi taqdimotining barcha yangi mahsulotlari bilan oldindan tanishib chiqdik va hattoki, O‘zbekistonda birinchi bo‘lib buklanadigan smartfonlar haqidagi videoni ham e’lon qildik. Taqdimotdan so’ng biz barcha gadjetlarni sinchkovlik bilan sinab ko’rdik va eng qiziqarlilari haqida yozdik: Fold5 va Flip5, Tab S9 Ultra plansheti va endi Watch6 Classic soati haqida gaplashish vaqti keldi.
2022-yilning yozidan beri men Galaxy Watch4 Classic`dan foydalanib kelaman va undan ko’nglim to’q. Ular deyarli hamma narsada yaxshi — faqat soatda avtonomiya bilan bog’liq muammolar bor, shuning uchun men yangi mahsulotni sinab ko’rishga ikki baravar qiziqdim. Bundan tashqari, beshinchi Watch`da mexanik ramkadan voz kechilgandan so’ng, oltinchi klassik avlodda yana qaytdi — Watch6 Classic brend muxlislari tomonidan juda qadrlanadigan uzuk bilan jihozlangan.
To’plam va tasmalar
Yangi soat modelining qutilari oldingi versiyalardagi kabi hamma narsani — gadjetga qo’shimcha ravishda standart tasma va quvvat manbaisiz magnitli zaryadlash uskunasini o’z ichiga oladi. Shunisi e’tiborga loyiqki, hatto eng oddiy tasma ham mening soatimdagiga qaraganda teginish uchun yoqimliroq edi. Endi silikon material haqiqiy iplar bilan tikilgan va teriga o’xshash tuzilishga ega.
Boshqa o’zgarishlar qatorida Samsung soatlari muxlislari uchun asosiy o’zgarishlardan biri bu yangi tasma tutqichi bo’ldi. Endi ularni almashtirish uchun tugmachalarni bosishning o’zi kifoya qiladi. Bu osonlashdi. Sotuvda yangi tasmachalar mavjud bo’lib, ular orasida magnit mahkamlagichlarga ega eko-charm variantini alohida ta’kidlashni istardim.
Klassik dizayn
Shuni aytish joizki, mening Watch4 Classic soatim hali ham juda mustahkam va zamonaviy ko’rinadi. Ammo men uni Watch6 Classic bilan taqqoslaganimda, men biroz xafa bo’lganday bo’ldim — yangi mahsulot fonida mening soatim gadjetlar olamining haqiqiy “dinozavr"iga o’xshardi. Hammasi kattalashtirilgan ekran tufayli. Aniqrog’i, displey atrofidagi qisqartirilgan ramkalar — faqat uning minimal qalinligi meni soatni yangilashga majbur qiladi.
Tanlash uchun ikkita o’lcham mavjud — 43 va 47 millimetr.
Mexanik ramka ham yupqalashdi, ammo u hamon mustahkam ko’rinadi. Shu bilan birga, shuni tushunish kerakki, vaqt o’tishi bilan uzuk ostida chang to’planib qoladi, bu interfeys bilan o’zaro aloqani qiyinlashtiradi va undan foydalanishni murakkablashtiradi. Kirdan qutulish uchun uni suv ostida bir necha marta oldinga va orqaga ehtiyotkorlik bilan aylantiraman, taxminan har ikki-uch haftada bir marta.
Ajoyib displey
Watch6 Classic ekrani o’zimning Watch4 Classic soatim bilan solishtirganda 1,4 dyuymdan 1,5 dyuymgacha oshgan. Yorqinlik zaxirasi sezilarli darajada oshirilgan, bu ayniqsa ochiq havoda foydali bo’ldi. Himoya ham o’zgartirilgan — beshinchi avloddan boshlab displey oddiy shisha bilan emas, balki sapfir oyna bilan qoplangan. Suvdan himoya bir xil darajada — IP68 50 metr chuqurlikka sho’ng’ishgacha dosh bera oladi.
Samaradorlik bir xil bo’lib qolmoqda
Yangi mahsulot ichiga Samsung`ning shaxsiy Exynos W930 chipi o‘rnatilgan bo‘lib, u samaradorligi jihatidan beshinchi va to‘rtinchi avlodlarda o‘rnatilgan Exynos W920'dan umuman farq qilmaydi. Shu bilan birga, grafik yadro bir xil bo’lib qolmoqda. Demak, protsessor quvvatini biroz oshirish uchun yangi avlodga o’tishdan ma’no yo’q.
Operativ xotira oshirildi — endi u 2 GB (oldingisi 1,5 GB edi).
Yomon avtonomiya
Xo’sh, agar shu sharhning shu joyigacha sezilarli kamchiliklar bo’lmagan bo’lsa, aytib o’rishim kerakki, bu mahsulotda — avtonomiya umuman yo’q. Menimcha Samsung bu jihatini ozgina bo’lsada yaxshilamasdan turib yangi soatlar chiqarishga haqqi yo’q edi. Faqat Apple Watch va Galaxy Watch foydalanuvchilari soatlarimizni har kuni quvvatlash azobini tushunishadi, Xiaomi va Huawei tomonidan ishlab chiqarilgan raqobatchi soatlar esa bir hafta davomida “turib bera oladi”.
Tajribamdan shuni aytishim mumkinki, agar siz energiya tejash rejimini o’chirsangiz, soatni har kuni zaryadga qo’yishingiz mumkin, ammo bu ham qulay emas. Yaxshi smartfon bilan teng narxga soat sotib olsangiz, undan to’liq foydalanishni xohlaysiz.
Xulosa shunday: soatlarini har kuni zaryad qilishga tayyor bo’lganlar uchun Watch6 Classic mos keladi. Ammo men bundan charchadim va Watch4 Classic ishlamay qolgandan keyin, agar Samsung keyingi avlodlarda faol foydalanish bilan batareyaning ishlash muddatini bir haftagacha uzaytirmasa, Huawei yoki Xiaomi soatidan sotib olaman.
Xulosa va narx
Menga Watch6 Classic faqat vizual tomondan yoqdi — yupqa ramkali kattalashtirilgan ekran ta’sirli ko’rinadi. Funksional jihatdan, ishlash va avtonomiya nuqtai nazaridan, bu mendagi Watch4 Classic`ning deyarli to’liq nusxasi, shuning uchun men yangi mahsulotga o’tishdan ma’no ko’rmayapman.
O’ylaymanki, uchinchi Galaxy Watch yoki undan kattaroq modellarning egalari ularni yangilashlari mumkin, ammo bir yarim millionlik Watch4 Classic bilan farq uyatli bo’lmasa. Samsung smartfoni bilan ishlash uchun mexanik ramkali zamonaviy zamonaviy soat izlayotgan har bir kishiga Watch6 Classic`ni tavsiya qilishim mumkin — bunday tandemda gadjet soat kabi ishlaydi.
Sharh yozish vaqtida Toshkentdagi Watch6 Classic narxi 3 500 000 so‘mdan boshlanadi. Yangi Watch4 Classic`ni 2 100 000 so‘mdan boshlab xarid qilish mumkin.
