Oldin va hozir: “Muhtasham yuz yil” seriali aktyorlari 14 yil ichida qanchalik o‘zgardi?

Usmonlilar davrida eng uzoq hukmronlik qilgan sulton Sulaymon I va uning rafiqasi Hurram Sulton haqida hikoya qiluvchi serial 2011-yil 5-yanvardan Turkiyaning Show TV telekanalida namoyish etila boshlangandi.

Keyinchalik serial namoyishi Star TV kanaliga ko‘chirilgan. Loyiha Markaziy Osiyo ekranlariga, jumladan, O‘zbekistonga dastlab rus tilidagi dublyaj orqali yetib kelgan. O‘zbek tilidagi versiya TV Markaz orqali taqdim etilishi rejalashtirilgandi, biroq namoyish to‘xtatib qo‘yilgan.

Afisha.uz shu paytga qadar 130 million lira (40 mlrd 230 mln so‘m) ishlab topib, turk seriallari ichida eng daromadbop bo‘lgan loyiha aktyorlari 14 yil ichida qanchalik o‘zgargani haqida batafsil ma’lumot beradi.

---

Halit Ergench

Serialning bosh qahramoni, donishmand va qudratli Sulton Sulaymon rolini ijro etgan aktyor Halit Ergench joriy yil 30-aprel sanasida 55 yoshni qarshi oldi. Halit san’atkorlar oilasida tug‘ilgan — otasi mashhur turk aktyori Sait Ergench bo‘lgan. U dastlab texnika yo‘nalishida tahsil olgan bo‘lsa-da, keyinchalik o‘zini teatr va kinoda sinab ko‘rishga qaror qilgan va 1990-yillarning o‘rtalaridan sahnadagi faoliyatini boshlagan.

2003-yildagi ilk muvaffaqiyatlaridan so‘ng 2006−2014-yillar oralig‘ida Halitga Turkiya kinematografiyasida talab keskin oshdi. Ayniqsa, “Mushtasham yuz yil” serialidagi Sulaymon roli uni nafaqat turk tomoshabinlari, balki xalqaro auditoriya orasida ham mashhur qildi.

Halit Ergenç bugungi kunda ham san’atda faol bo‘lib, yangi serial va filmlarda ishtirok etishda davom etmoqda. Shu bilan birga, u madaniy loyihalar va xayriya tadbirlarida muntazam qatnashadi.

Meryem Uzerli

“Mushtasham yuz yil” serialida Hurram Sulton obrazini yaratgan aktrisa Meryem Uzerli 12-avgust kuni 42 yoshni qarshi oladi. Germaniyada tug‘ilib o‘sgan Meryem turk va nemis madaniyatining uyg‘unlashgan vakilidir. U aktyorlik faoliyatini teatr va kichik televizion loyihalardan boshlagan, biroq aynan Hurram roli uning ijodidagi eng yirik burilish nuqtasiga aylangan.

Serialdagi Hurram Sulton — keskin xarakteri, zukkoligi va kuchli irodasi bilan tanilgan tarixiy shaxs. Meryem bu obrazni jonlantirishda o‘zining hissiyotga boy ijrosi, mimikasi va dramatik kuchi bilan tomoshabinlarni hayratga soldi. Uning ijrosi tufayli Hurram Sulton obrazi nafaqat Turkiyada, balki butun dunyo bo‘ylab mashhur bo‘ldi.

Meryem Uzerli “Yuz yil"dan so‘ng ham bir nechta yirik kino va serial loyihalarida ishtirok etdi, xalqaro miqyosda faoliyatini davom ettirdi. Shuningdek, u moda, go‘zallik va xayriya sohalarida ham faol bo‘lib, o‘zining ijtimoiy tashabbuslari bilan ham tanilgan.

Nebahat Chehre

Serialda Sulton Sulaymonning onasi rolini ijro etgan Nebahat Chehre bu yil 81 yoshni qarshi oldi. U Turkiya kinosi va teatrining eng tajribali, hurmatli aktrisalaridan biri bo‘lib, o‘z faoliyatini 1960-yillarda model va kino aktrisasi sifatida boshlagan. Nebahat uzoq yillik ijodiy faoliyati davomida yuzlab loyihalarda ishtirok etib, o‘zining mahorati va nafis obrazlari bilan tomoshabinlar e’tiborini qozongan.

Serialdagi Valide Sulton obrazi — siyosiy tajribasi, dono maslahatlari va saroydagi katta obro‘si bilan ajralib turadi. Nebahat bu obrazni o‘ziga xos jiddiylik, qadr-qimmat va kuchli xarizma bilan gavdalantirdi. Uning ijrosi tufayli qahramoni nafaqat saroy ichidagi muhim figura, balki butun voqealar rivojiga ta’sir o‘tkazuvchi markaziy shaxs sifatida yodda qoldi.

Nebahat Chehre “Mushtasham yuz yil"dan so‘ng ham faoliyatini davom ettirib, turli kino va televideniye loyihalarida ishtirok etdi. U san’atdagi faoliyati bilan bir qatorda, yosh aktyorlar uchun ustoz va ilhom manbai bo‘lib kelmoqda.

Okan Yalabik

“Mushtasham yuz yil” serialida Pargali Ibrohim posho — Sulton Sulaymonning eng yaqin do‘sti va davlat ishlaridagi asosiy maslahatchisi rolini ijro etgan Okan Yalabik 2025-yil 13-dekabr sanasida 47 yoshni qarshi oladi. U Istanbul universiteti Davlat konservatoriyasida teatr san’ati bo‘yicha tahsil olgan va 1990-yillarning oxiridan boshlab kino hamda teatr sahnasida faol ijod qilib keladi.

Serialdagi Ibrahim posho obrazi — sodiqlik, aql-zakovat va siyosiy mahoratning timsoli. Okan Yalabik bu qahramonni kuchli dramatik yondashuv bilan gavdalantirib, uning yuksalishi va fojeali qulash jarayonini ishonarli tarzda aks ettirdi. Ibrohim posho va Sulton Sulaymon o‘rtasidagi murakkab munosabatlar serialning eng ta’sirli dramatik chiziqlaridan biriga aylandi.

Okan Yalabik “Mushtasham yuz yil"dan so‘ng ham ko‘plab kino va serial loyihalarida ishtirok etdi, shuningdek, ovoz berish va teatr sahnasida ham faol bo‘ldi. 2024-yilda taqdim etilgan “Moviy g‘or” filmidagi Xorun obrazi aktyorning so‘nggi rollaridan biri bo‘lib turibdi.

Nur Fettahog‘lu

“Mushtasham yuz yil” serialida Mohidavron sulton — Sulton Sulaymonning ilk rafiqasi va shahzoda Mustafoning onasi rolini ijro etgan Nur Fettahog‘lu 12-noyabr kuni 44 yoshni qarshi oladi. U Germaniyaning Duisburg shahrida tug‘ilgan, Turkiyada esa iqtisod va dizayn sohasida ta’lim olgan. Nur dastlab teleboshlovchi sifatida tanilgan bo‘lsa-da, keyinchalik aktyorlikka qadam qo‘yib, qisqa vaqt ichida mashhur bo‘lib ketdi.

Serialdagi Mohidavron sulton obrazi — matonatli, g‘ururli va o‘g‘li uchun hamma narsaga tayyor ayol timsoli. Nur Fettahog‘lu bu qahramonni nafaqat go‘zallik, balki ichki kuch va dramatik hissiyotlar bilan gavdalantirdi. Mohidavronning Hurram sulton bilan raqobati va o‘g‘li Mustafoni himoya qilish yo‘lidagi kurashi serialdagi eng keskin voqealardan biri bo‘lib qoldi.

Nur Fettahog‘lu serialdan keyin ham bir nechta yirik serial va filmlarda bosh rollarni ijro etdi. U o‘zining nafis uslubi va kuchli dramatik talqini bilan turk televideniyesining eng e’tiborga molik aktrisalaridan biri sifatida tanilgan. Nur so‘nggi marta 2024-yilda namoyish etilgan “Yovvoyi” teleserialida Aydin rolini ijro etdi.

Selma Ergech

Serialda Sulton Sulaymonning singlisi va buyuk davlat arbobi Ibrohim poshoning rafiqasi rolini ijro etgan Selma Ergech 1-noyabr kuni 45 yoshni qarshi oladi. Germaniyada tug‘ilgan aktrisa tibbiyot sohasida tahsil olgan, biroq keyinchalik modellik va kino olamiga kirib kelgan. U o‘zining nafisligi va tabiiy iste’dodi bilan tez orada turk ekranlarida tanilib ketdi.

Serialdagi Xadicha sulton obrazi — mehribon, ammo taqdiri murakkab ayol qiyofasi sifatida tomoshabinlar yodida qoldi. Selma Ergech bu qahramonga chuqur dramatizm, muloyimlik va ichki iztirob uyg‘otuvchi hissiyotlar baxsh etdi. Uning Parg‘ali Ibrohim poshoga bo‘lgan sadoqati va oilaviy fojialarini aks ettirgan sahnalar serialdagi eng ta’sirli epizodlardan bo‘ldi.

Selma Ergech “Mushtasham yuz yil"dan tashqari ham ko‘plab mashhur loyihalarda ishtirok etib, o‘zini professional aktrisa sifatida namoyon qildi. U so‘nggi marta 2021-yilda “Sovg‘a” veb-serialida Umut rolini ijro etdi.

Selim Bayraktar

Selim Bayraktar — “Muhtasham yuz yil” serialida unutilmas Sumbul og‘a obrazini yaratgan turk aktyori. 1975-yil 17-fevralda tug‘ilgan Selim asli Iroqning Kirkuk shahridan bo‘lib, keyinchalik Turkiyaga ko‘chib kelgan. San’at olamiga qadam qo‘yishidan oldin u Anqara davlat konservatoriyasida ta’lim olgan va teatr sahnasida tajriba orttirgan.

Serialdagi Sumbul og‘a obrazi uning ijodida alohida o‘rin tutadi. Haramning bosh evnuxi sifatida Sumbul og‘a ham hazilkash, ham ziyrak xarakterga ega bo‘lib, saroy ichidagi ko‘plab sirlarni biladi. U bir vaqtning o‘zida ham hukmdor, ham sultonalar, ham xizmatkorlar bilan til topa oladigan, voqealarga bevosita ta’sir ko‘rsatadigan personajdir.

Selim Bayraktar “Muhtasham yuz yil"dan keyin ham bir nechta kino va seriallarda rol ijro etgan, ammo Sumbul og‘a obrazi uning nomini butun dunyo bo‘ylab tanitdi. Uning o‘ziga xos aktyorlik uslubi va sahnadagi jonli energiyasi tomoshabinlar qalbida chuqur iz qoldirdi.

Ozan Gyuven

Ozan Gyuven 1975-yil 19-mayda Germaniyaning Nyurnberg shahrida tug‘ilgan. Bolaligida Turkiyaga qaytgan va Istanbulda o‘sgan. Istanbul universiteti Davlat konservatoriyasining raqs bo‘limida tahsil olgan bo‘lib, keyinchalik teatr va kinoga qadam qo‘ygan. Ozan o‘zining o‘ziga xos xarizmasi va ijodiy yondashuvi bilan tomoshabinlar e’tiborini qozongan.

“Muhtasham yuz yil” serialida u murakkab xarakterga ega Rustam posho obrazini gavdalantirdi. Saroydagi eng qudratli vazirlardan biri sifatida Rustam posho siyosiy intrigalarda faol ishtirok etadi va o‘z manfaatlari yo‘lida qat’iy qarorlar qabul qiladi. Ozan Gyuvenning bu roldagi ishonarli ijrosi obrazni yanada jonli va ta’sirchan qilib ko‘rsatgan.

Serialdagi muvaffaqiyatdan so‘ng Ozan Gyuven turli janrdagi filmlar va loyihalarda ishtirok etib, turk kino olamida o‘z o‘rnini mustahkamladi. 2024-yilda premyera qilingan “Tosh, qaychi, qog‘oz” filmidagi Xorun obrazi aktyor faoliyatidagi so‘nggi rollardan biri bo‘lib qolmoqda.

Merve Bolugur

Merve Bolugur 1987-yil 16-sentyabrda Istanbul shahrida tug‘ilgan. U Istanbul universitetining San’at fakultetida tahsil olib, aktyorlik faoliyatini yoshligidan boshlagan. Merve o‘zining jozibali qiyofasi va sahnadagi ishonarli ijrosi bilan qisqa vaqt ichida mashhurlikka erishdi.

“Muhtasham yuz yil” serialida Merve Nurbonu Sulton obrazini gavdalantirdi. U zukko, hiylakor va saroy intrigalari markazida bo‘lgan ayol sifatida voqealarning rivojida muhim o‘rin tutadi. Mervening bu obrazdagi o‘tkir nigohlari va o‘ziga xos ijro uslubi Nurbonuni tomoshabinlar uchun unutilmas qahramonga aylantirdi.

Serialdagi muvaffaqiyat Merve Bolugur uchun katta ijodiy sakrash bo‘ldi. U keyinchalik bir nechta mashhur turk seriallarida bosh rollarni ijro etdi va o‘zining dramatik hamda romantik rollardagi mahoratini namoyon qildi. Aktrisa so‘nggi marta 2017-yilda filmda suratga tushdi.

“Muhtasham yuz yil” serialining saundtreki turk kompozitori Fahir Atakoglu tomonidan yaratilgan bo‘lib, unda sharqona kuylar, klassik orkestr ohanglari va dramatik ritmlar uyg‘unlashgan. Musiqiy bezak serialning har bir sahnasiga hissiy chuqurlik qo‘shib, voqealarning tarixiy va dramatik kayfiyatini yanada kuchaytiradi.

Asosiy mavzu kuyidan tortib, sultonga xos tantanavor marosim ohanglari hamda harem sahnalaridagi nozik kuylar tomoshabinni 16-asr Usmonli saroyining muhitiga olib kiradi. Saundtrek nafaqat serialni tomosha qilish jarayonida, balki alohida tinglanganda ham o‘zining badiiy qiymatini saqlab qoladi.